کلٹی فرینڈشپ فاؤنڈیشن کے زیر اہتمام اتوار کے دن کلٹی ٹی بی اسپتال گراؤنڈ میں ایک ڈرائنگ مقابلہ منعقد کیا گیا جس میں کلٹی کے مختلف زبانوں کے اسکولوں کے سینکڑوں سے زائد طلباء وطالبات نے حصہ لیا اور اپنی صلاحیتوں کا بھرپور مظاہرہ کیا۔اس مقابلے میں بہترین ڈرائنگ کا نمونہ پیش کرنے والے بچے وبچیوں کو اسناد اور انعامات پیش کئے گئے۔اسی موقعے پرشہر کلٹی سے تعلق رکھنے والے اردو،ہندی اور بنگلہ میڈیم کے وہ ہونہار طلبہ جنہوں نے مدھیامک اور ہائیر سیکنڈری میں نمایاں کامیابی حاصل کی انہیں بھی ایوارڈ سے نوازہ گیا۔علاوہ ازیں پرائمری وہائی اسکولوں کے علاؤہ کالج میں تدریسی خدمات انجام دینے والے اساتذہ جو ملازمت سے سبکدوش ہو چکے ہیں ان کی خدمات کے اعتراف میں انہیں بھی بہترین معلم ایوارڈ سے سرفراز کیا گیا۔ایوارڈ پانے والوں میں کلٹی کی معروف تعلیمی شخصیت ماسٹر مدثر انصاری اور پروفیسر ندیم اختر بھی شامل ہیں۔نظامت کی ذمہ داری اور مہمانوں کا استقبال فرینڈشپ فاؤنڈیشن کے روح رواں اور جواں سال سماجی خدمت گار محمد ذیشان نے کیا۔
