*کنستوڑیا میں سڑک حادثہ، مقامی افراد کا احتجاج، اسپیڈ بریکر بنانے کا مطالبہ*

جمعرات کے روز تقریباً دوپہر بارہ بجے جموڑیا بدھان سبھا حلقہ کے تحت کنستوڑیا کانٹا موڑ کے قریب ایک سڑک حادثہ پیش آیا، جس میں مقامی باشندہ 45 سالہ آشیش منڈل زخمی ہو گئے۔ مقامی ذرائع کے مطابق ہری پور کی جانب سے ایک لاری پنجابی موڑ کی طرف جا رہی تھی۔ اسی دوران کنستوڑیا کانٹا موڑ کے قریب سڑک کے کنارے کھڑے آشیش منڈل کو پیچھے سے آنے والی لاری نے اچانک ٹکر مار دی، جس کے نتیجے میں وہ زخمی ہو گئے۔ تاہم ان کی چوٹیں معمولی نوعیت کی بتائی جا رہی ہیں۔
واقعہ کے بعد مقامی باشندوں میں شدید غم و غصہ دیکھا گیا اور انہوں نے احتجاج کرتے ہوئے قومی شاہراہ نمبر 14 کو تقریباً ایک گھنٹے تک جام رکھا۔ مظاہرین کا مطالبہ تھا کہ کانٹا موڑ کے نزدیک فوری طور پر اسپیڈ بریکر تعمیر کیا جائے، بصورت دیگر وہ احتجاج ختم نہیں کریں گے۔ مقامی لوگوں کا کہنا ہے کہ اس مقام پر اس سے قبل بھی کئی سنگین حادثات پیش آ چکے ہیں، جن میں بعض افراد شدید زخمی ہوئے جبکہ کچھ اپنی جان سے بھی ہاتھ دھو بیٹھے۔ ان کا الزام ہے کہ پہلے بھی اسپیڈ بریکر کے مطالبے پر احتجاج کیا گیا تھا، مگر انتظامیہ کی جانب سے کوئی مؤثر قدم نہیں اٹھایا گیا۔
اطلاع ملتے ہی جموڑیا تھانہ اور کیندا چوکی کی پولیس موقع پر پہنچ گئی۔ پولیس نے مقامی افراد کو سمجھا بجھا کر تقریباً ایک گھنٹے بعد سڑک سے احتجاج ختم کرایا اور ان کے مطالبات پر غور کرنے کی یقین دہانی کرائی۔ فی الحال قومی شاہراہ پر ٹریفک کی آمد و رفت معمول کے مطابق جاری ہے۔