مغربی بنگال کے صنعتی شہر درگاپور میں چھنتائی کے ایک واقعہ کے چند ہی گھنٹوں کے اندر تین ملزمان کو گرفتار کر کے کوک اوون پولیس اسٹیشن کی پولیس نے تیز کارروائی کی مثال پیش کی ہے۔
اطلاعات کے مطابق جمعرات کی دوپہر ریتو گھوش نامی بندھن بینک کی ایک خاتون ملازمہ اپنا کام ختم کرنے کے بعد اسکوٹی سے سٹی سینٹر میں واقع اپنی شاخ کی طرف واپس جا رہی تھیں۔ اسی دوران جب وہ پیالا گاؤں کے قریب سروس روڈ پر پہنچیں تو تین نوجوانوں نے ان کا راستہ روکنے کی کوشش کی۔ الزام ہے کہ ملزمان نے ان کا موبائل فون چھین لیا اور قریب کے جنگل کی طرف فرار ہو گئے۔
واقعہ کی اطلاع ملتے ہی کوک اوون تھانے کے او سی وجے دلپتی نے فوری طور پر ایک خصوصی ٹیم تشکیل دے کر تحقیقات شروع کر دی۔ پولیس ذرائع کے مطابق موقع اور آس پاس کے علاقوں میں تلاشی مہم چلانے کے بعد چند ہی گھنٹوں میں تینوں ملزمان کو گرفتار کر لیا گیا۔
گرفتار شدگان کی شناخت ریجو باؤری (28)، سمیر باؤری (27) اور بپّا باؤری (30) کے طور پر ہوئی ہے، جو سبھی پیالا گاؤں کے رہائشی بتائے جاتے ہیں۔ پولیس ملزمان کے قبضے سے چھینا گیا موبائل فون برآمد کرنے کی کوشش بھی کر رہی ہے۔
پولیس کی اس فوری کارروائی پر متاثرہ بینک ملازمہ نے اطمینان کا اظہار کرتے ہوئے کہا کہ کام کے سلسلے میں بہت سی خواتین کو روزانہ سڑکوں پر نکلنا پڑتا ہے، اس لیے سکیورٹی انتہائی اہم ہے۔ انہوں نے پولیس کی مستعدی پر شکریہ ادا کیا۔
پولیس کے مطابق گرفتار ملزمان کو 7 دن کی پولیس ریمانڈ کی درخواست کے ساتھ درگاپور سب ڈویژنل کورٹ میں پیش کیا جائے گا۔ معاملے کی مزید تحقیقات جاری ہیں۔
