مغربی بنگال اسمبلی انتخابات کے پیش نظر پانڈیشور اسمبلی حلقہ میں سیاسی درجہ حرارت تیزی سے بڑھتا جا رہا ہے۔ انتخابی مہم کے درمیان بی جے پی کو اس وقت بڑا جھٹکا لگا جب ویدیہ ناتھ پور علاقے میں پارٹی کے بوتھ صدر نے اپنے حامیوں کے ساتھ بی جے پی چھوڑ کر ترنمول کانگریس میں شمولیت اختیار کر لی۔
یہ شمولیت ترنمول کانگریس کے امیدوار نریندر ناتھ چکرورتی کی انتخابی مہم کے دوران عمل میں آئی، جہاں انہوں نے نئے شامل ہونے والے کارکنوں کو پارٹی کا جھنڈا تھما کر خیرمقدم کیا۔ اس واقعہ کو علاقے میں بی جے پی کے مضبوط گڑھ میں بڑی دراڑ کے طور پر دیکھا جا رہا ہے۔ بدھ کے روز ویدیہ ناتھ پور میں ترنمول امیدوار نریندر ناتھ چکرورتی عوامی رابطہ مہم کے لیے پہنچے تھے، اسی دوران نہ صرف بی جے پی بلکہ سی پی آئی (ایم) کے کئی سرگرم کارکن بھی اپوزیشن چھوڑ کر حکمراں جماعت میں شامل ہو گئے۔ پارٹی تبدیل کرنے والے کارکنوں کا کہنا ہے کہ وہ ممتا بنرجی کی ترقیاتی پالیسیوں سے متاثر ہو کر ترنمول کانگریس میں شامل ہوئے ہیں۔ سیاسی ماہرین کا ماننا ہے کہ انتخابات سے عین قبل بوتھ سطح کے رہنماؤں کا اس طرح پارٹی چھوڑنا اپوزیشن کے لیے ایک بڑا چیلنج بن سکتا ہے اور اس کے اثرات انتخابی نتائج پر بھی پڑ سکتے ہیں۔
