آسنسول جنوبی تھانہ پولیس نے جبراً وصولی اور دھمکی سمیت متعدد سنگین الزامات کے تحت ترنمول کانگریس کی مزدور تنظیم آئی این ٹی ٹی یو سی کے آسنسول نارتھ بلاک صدر راجو اہلووالیہ کو گرفتار کر لیا ہے۔ اتوار کی رات اس گرفتاری کی خبر سامنے آنے کے بعد آسنسول کے سیاسی حلقوں میں ہلچل مچ گئی ہے۔
اطلاعات کے مطابق، اتوار کی شام تقریباً ساڑھے سات بجے پولیس کی ایک ٹیم نے جی ٹی روڈ کے بی این آر موڑ کے قریب سے راجو الووالیہ کو حراست میں لیا اور بعد ازاں انہیں آسنسول جنوبی تھانے منتقل کیا گیا۔ ذرائع کے مطابق ان کے خلاف طویل عرصے سے جبراً وصولی کے الزامات زیر تفتیش تھے اور ان کے خلاف باقاعدہ شکایات بھی درج تھیں۔ ان شکایات کی جانچ کے بعد پولیس نے کارروائی کرتے ہوئے انہیں گرفتار کیا۔
اس سلسلے میں آسنسول-دُرگاپور پولیس کمشنریٹ کے ڈی سی پی (سینٹرل) دھرو داس نے تصدیق کی ہے کہ ملزم کو گرفتار کر لیا گیا ہے اور معاملے کی مکمل تحقیقات جاری ہیں۔ ان کا کہنا ہے کہ پورے نیٹ ورک کی جانچ کی جا رہی ہے اور یہ معلوم کرنے کی کوشش کی جا رہی ہے کہ اس مبینہ جبراً وصولی کے معاملے میں مزید کون کون افراد شامل ہیں، اور ضرورت پڑنے پر ان کے خلاف بھی کارروائی کی جائے گی۔
پولیس حکام کے مطابق ملزم کو جلد ہی آسنسول عدالت میں پیش کیا جائے گا اور ریمانڈ کی درخواست دی جائے گی تاکہ مزید تفتیش کی جا سکے۔ اس واقعے کے بعد سیاسی حلقوں میں بحث و مباحثہ شروع ہو گیا ہے جبکہ پولیس نے واضح کیا ہے کہ قانون شکنی اور جبراً وصولی کے خلاف کارروائیاں جاری رہیں گی۔
