گانجہ کی اسمگلنگ کے خلاف ایک بڑی کارروائی کرتے ہوئے آسنسول شمالی تھانہ پولیس ، جہاںگیری محلہ پھانڑی اور نارکوٹکس محکمہ کی مشترکہ ٹیم نے تین خواتین اسمگلروں کو گرفتار کر لیا۔ پولیس نے ان کے قبضے سے تقریباً 20 کلو گانجہ برآمد کیا ہے۔ پولیس ذرائع کے مطابق خفیہ اطلاع ملی تھی کہ کچھ خواتین ٹرین کے ذریعے جمشید پور سے گانجہ کی بڑی کھیپ لے کر آسنسول آ رہی ہیں۔ اس اطلاع کو سنجیدگی سے لیتے ہوئے پولیس اور نارکوٹکس ٹیم نے آسنسول ریلوے اسٹیشن کے پلیٹ فارم نمبر 7 کے قریب واقع میدان میں جال بچھایا۔
تلاشی کے دوران تینوں خواتین کے پاس سے مجموعی طور پر 20 کلو گانجہ برآمد کیا گیا۔ پولیس نے موقع پر ہی تینوں ملزم خواتین کو رنگے ہاتھوں گرفتار کر لیا۔ یہ کارروائی آسنسول نارتھ تھانہ، جہاںگیری محلہ پھانڑی اور نارکوٹکس محکمہ کی مشترکہ ٹیم کی جانب سے انجام دی گئی۔ فی الحال تینوں ملزمان کو پولیس حراست میں لے لیا گیا ہے اور مزید پوچھ گچھ جاری ہے۔
پولیس کا کہنا ہے کہ اس معاملے کی گہرائی سے تفتیش کی جا رہی ہے تاکہ یہ معلوم کیا جا سکے کہ اسمگلنگ کے اس نیٹ ورک کے پیچھے اور کون لوگ شامل ہیں اور گانجہ کی یہ کھیپ کہاں سپلائی کی جانی تھی۔
