مغربی بنگال کے صنعتی شہر آسن سول میں جمعرات کی صبح اس وقت سنسنی پھیل گئی جب انڈیا پوسٹ کے آسن سول ہیڈ پوسٹ آفس کو آر ڈی ایکس سے اُڑانے کی دھمکی بھرا ای میل موصول ہونے کی اطلاع سامنے آئی۔ دھمکی ملتے ہی پورے ڈاک گھر کے احاطے کو فوری طور پر خالی کرا دیا گیا اور سکیورٹی کے پیش نظر عمارت کو بند کر کے سیل کر دیا گیا۔
اطلاعات کے مطابق صبح تقریباً 11 بج کر 15 منٹ پر کولکاتا کے ریجنل دفتر کو ایک مشتبہ ای میل موصول ہوا، جسے مبینہ طور پر تمل ناڈو سے بھیجا گیا بتایا جا رہا ہے۔ اس ای میل میں آسن سول ہیڈ پوسٹ آفس کو آر ڈی ایکس سے دھماکے میں اُڑانے کی دھمکی دی گئی تھی، جس کے بعد حکام میں کھلبلی مچ گئی۔
ای میل ملتے ہی پوسٹ آفس انتظامیہ نے فوری احتیاطی اقدامات کرتے ہوئے تمام ملازمین اور وہاں موجود شہریوں کو بحفاظت باہر نکال دیا۔ سکیورٹی کو مدنظر رکھتے ہوئے مرکزی دروازہ بند کر دیا گیا اور عارضی طور پر کسی بھی شخص کے داخلے پر پابندی لگا دی گئی۔
اس واقعے کے سبب ڈاک سے متعلق تمام خدمات وقتی طور پر بند کر دی گئیں، جس کے باعث عام لوگوں کو کافی مشکلات کا سامنا کرنا پڑا۔ اطلاع ملتے ہی پولیس اور دیگر سکیورٹی ایجنسیاں موقع پر پہنچ گئیں اور پورے احاطے میں سخت تلاشی مہم شروع کر دی گئی۔ ہر کونے کی باریک بینی سے جانچ کی جا رہی ہے تاکہ کسی بھی مشتبہ شے کا پتہ لگایا جا سکے۔
پوسٹ آفس کے ڈپٹی سپرنٹنڈنٹ کومل سنگھ نے بتایا کہ کولکاتا سے موصول ہونے والی ای میل میں پوسٹ آفس کو اُڑانے کی دھمکی دی گئی تھی، جس کے بعد فوری طور پر دفتر خالی کرا دیا گیا اور احتیاطاً کام کاج روک دیا گیا ہے۔ ان کے مطابق پولیس پورے معاملے کی تفتیش کر رہی ہے اور سکیورٹی کے معاملے میں کوئی خطرہ مول نہیں لیا جا رہا۔
واقعے کے دوران موجود ایک شہری نے بتایا کہ انہیں ڈاک سے متعلق ایک اہم کام کرنا تھا، مگر بم کی دھمکی کی خبر کے باعث دفتر بند ہونے سے انہیں واپس جانا پڑا۔ اس واقعے کے بعد علاقے میں تشویش اور غیر یقینی کی صورتحال دیکھنے کو ملی۔
واقعے کے بعد پورے علاقے میں سکیورٹی مزید سخت کر دی گئی ہے اور آس پاس کے علاقوں میں بھی نگرانی بڑھا دی گئی ہے۔ مسلسل مل رہی دھمکیوں کے پیش نظر آسن سول میں سکیورٹی ایجنسیاں ہائی الرٹ پر ہیں اور جانچ مکمل ہونے تک پوسٹ آفس احاطے میں کڑی نگرانی جاری رہے
