اَنڈال: سوموار کی شام اَنڈال میں واقع قاضی نذرل ایئرپورٹ پر ایک مشتبہ نیلے رنگ کے بیگ کی موجودگی سے بم کا خدشہ پیدا ہو گیا، جس کے بعد علاقے میں خوف و ہراس پھیل گیا۔ اطلاع ملتے ہی فائر بریگیڈ، پولیس اور سی آئی ڈی کا بم اسکواڈ فوراً موقع پر پہنچا۔
یہ واقعہ سوموار کی شام تقریباً ساڑھے چار بجے پیش آیا، جب ایئرپورٹ کے ٹرمینل کے باہر کھانے کے ایک اسٹال کے قریب نیلا رنگ کا بیگ طویل وقت تک لاوارث حالت میں پڑا دیکھا گیا۔ مقامی افراد نے بیگ کو مشکوک سمجھتے ہوئے فوراً پولیس کو اطلاع دی۔
پولیس، فائر بریگیڈ اور بم اسکواڈ کی ٹیموں نے فوراً موقع پر پہنچ کر بیگ کا معائنہ کیا۔ ماہرین نے جدید آلات کی مدد سے بیگ کی تفتیش کی۔ مکمل طور پر مطمئن ہونے کے بعد جب بیگ کو کھولا گیا تو اس میں سے کوئی بم یا دھماکہ خیز مواد نہیں ملا۔
حکام کے مطابق، بیگ کے اندر ایک چٹائی نما تھیلا موجود تھا، جس کے اندر چند بھٹے، آم اور کیک جیسے کھانے پینے کی چیزیں رکھی گئی تھیں۔ امکان ظاہر کیا جا رہا ہے کہ کوئی مسافر غلطی سے یہ بیگ وہاں چھوڑ گیا ہوگا۔
پولیس نے صورتحال پر قابو پاتے ہوئے عوام کو یقین دہانی کرائی کہ کسی بھی قسم کا خطرہ نہیں ہے اور ایئرپورٹ کی سکیورٹی مکمل طور پر چوکس ہے۔
