آسنسول میں واقع ویژن پبلک اسکول کا رنگا رنگ سالانہ فنکشن جمعرات کے روز شہر کے مشہور رابندر بھون میں بڑے ہی جوش و خروش کے ساتھ منعقد ہوا۔ اس موقع پر قاضی نذرل یونیورسٹی کے اسسٹنٹ پروفیسر ڈاکٹر خالد خان اور ڈاکٹر محمد ثناالحق بطور مہمانانِ خصوصی شریک ہوئے، جبکہ جماعت اسلامی ہند، پچھم بردوان کے ناظم محمد مشتاق احمد، ترنمول کانگریس کے رہنما شاہد پرویز سمیت سماجی و تعلیمی شخصیات کی بڑی تعداد نے بھی پروگرام میں شرکت کی۔
تقریب کا آغاز تلاوتِ کلامِ پاک کے بعد اسکول کے پرنسپل کی پُرتاثیر استقبالیہ تقریر سے ہوا، جس میں انہوں نے مہمانوں کا خیرمقدم کرتے ہوئے اسکول کی تعلیمی سرگرمیوں اور کامیابیوں پر روشنی ڈالی۔
سالانہ فنکشن کے دوران ننھے منے طلبہ و طالبات نے ڈرامہ، فینسی ڈریس، گروپ ڈانس اور دیگر متنوع ثقافتی پروگرام پیش کیے، جنہیں حاضرین نے بے حد سراہا۔ بچوں کی معصوم اور پُراثر پیشکشوں نے ناظرین کے دل جیت لیے اور پورا ہال تالیوں سے گونج اٹھا۔
اس موقع پر اسکول کے بانی جاوید راستی نے اپنے خطاب میں کہا کہ ویژن پبلک اسکول سی بی ایس سی سلیبس کے مطابق ایک انگریزی میڈیم ادارہ ہے، تاہم یہاں عربی اور اردو کی تعلیم پر بھی خصوصی توجہ دی جاتی ہے، تاکہ طلبہ جدید انگریزی تعلیم کے ساتھ ساتھ اپنی مادری زبان اور دینی شعور سے بھی بہرہ مند ہو سکیں۔ انہوں نے کہا کہ ادارے کا مقصد ہمہ جہت تعلیم کے ذریعے باکردار اور باصلاحیت شہری تیار کرنا ہے۔
آخر میں مہمانانِ خصوصی نے اسکول انتظامیہ کی کاوشوں کو سراہتے ہوئے بچوں کے روشن مستقبل کے لیے نیک خواہشات کا اظہار کیا۔
