انیسویں صدی کے عظیم مصلح قوم اور علیگڑھ مسلم یونیورسٹی کے بانی سرسید احمد خان کےیوم پیدائش کے موقعے پر انجمن ترقی اردو ہند پچھم بردوان نے سنیچر کی دوپہر شمالی آسنسول کے اوکے روڈ میں واقع سید نزرل مدھیامک شکشا کیندر میں یوم سرسید کے تعلق سے ایک کوئز مقابلے کااہتمام کیا
۔ اسکول کے معلم الحاج سید کبیر الدین کی صدارت میں سرسید کے حیات وخدمات پر منعقدہ کوئز مقابلے میں اسکول کے طلباء وطالبات نے پورے جوش و خروش کے ساتھ حصہ لیا۔پروگرام کاآغاز اسی اسکول کے ایک طالب علم نے تلاوت کلام پاک سے کیا ۔ انجمن کے سکریٹری ماسٹر محمد سلیمان نے افتتاحی گفتگو کے دوران سرسید کی زندگی کے مختلف گوشوں کو اجاگر کیا۔بعدازاں کوئز کے سوالات کاسلسلہ شروع ہوا۔بہت سارےطلبہ نے صحیح جواب بتاکر انعامات حاصل کئے۔دوران پروگرام اسکول کی جانب سے بھی سرسید ڈے کے موقعے پر درجہ پنجم تاہشتم کے طلبہ کے درمیان ہونے والے ڈرائنگ مقابلے کے اول ،دوئم اور سوئم مقام پانے والے بچے وبچیوں کو انعامات دئیے گئے۔پروگرام کے افتتاحی دور کی نظامت ماسٹر امتیاز احمد انصاری نے کی جبکہ کوئز ماسٹر کے فرائض ماسٹر علی انصاری انجام دئیے۔ موقعے پر اسکول کے ہیڈماسٹر سید آفتاب الکریم, ماسٹر محمد آصف ودیگر اساتذہ و استانیوں کے علاؤہ انجمن کی جانب سے سجاد حسین ،امان اللہ خان اور نشاط احمد موجود رہے۔ صدارتی خطبہ کے دوران سید کبیر الدین نے اردو زبان اور اردو طلبہ کے تعلق سےانجمن کے ذمہ داران کی کوششوں کی ستائش کی اور مستقبل میں انجمن کے ذریعہ اسکول میں طلبہ کےلئے کسی بھی طرح کے پروگرام کے انعقاد کےلئے مکمل تعاؤن پیش کرنے کی یقین دہانی کرائی۔
