مالیگاؤں ( پریس ریلیز) جامعہ محمدیہ ایجوکیشن سو سائٹی (منصورہ ) کے زیر اہتمام جاری مولانا مختار احمد ندوی ٹیکنیکل کیمپس (MMANTC) کیلئے یہ خوشی و مسرت کا مقام ہے کہ فرسٹ ایئر انجینئرنگ کے طالب علم یش راجندر ساوالے نے ناسک ضلعی اسپورٹس مقابلے 2025 میں شاندار کارکردگی کا مظاہرہ کیا۔یہ مقابلہ 8 تا 9 اکتوبر 2025 کو محکمۂ کھیل، ساوتری بائی پھولے پونے یونیورسٹی (SPPU) کے زیرِ اہتمام مینا تائی ٹھاکرے انڈور اسٹیڈیم، ناسک میں منعقد ہوا تھا۔
انجینئرنگ ڈگری سال اول کے طالب علم یش ساوالے نے 5000 میٹر دوڑ میں پہلا مقام اور 3000 میٹر (اسٹیپل چیس) میں دوسرا مقام حاصل کیا۔ اس شاندار کامیابی کے نتیجے میں انھیں ریاستی سطح کے اسپورٹس مقابلے 2025 کے لیے منتخب کیا گیا ہے، جو جلد پونے شہر میں منعقد ہوگا۔
اس کامیابی میں فزیکل ڈائریکٹر پروفیسر یونس خان، اسپورٹس کوآرڈینیٹر فہد بلال، اور این ایس ایس آفیسر ڈاکٹر ساجد نعیم کی رہنمائی و تعاون شامل رہا۔ اسی طرح ایڈمن ڈیپارٹمنٹ نے رجسٹریشن اور تکنیکی امور میں انتھک محنت کرکے طالب علم کے ضلعی اسپورٹس مقابلے میں شرکت کو یقینی بنایا۔
اس موقع پر جامعہ محمدیہ ایجوکیشن سوسائٹی کے معزز سیکریٹری جناب راشد ارشد مختار صاحب نے خوشی کا اظہار کرتے ہوئے کہا کہ مولانا مختار احمد ندوی ٹیکنیکل کیمپس کے طلبہ نہ صرف تعلیمی میدان بلکہ اسپورٹس میں بھی بہترین کارکردگی کا مظاہرہ اور نمایاں مقام حاصل کر رہے ہیں۔نیز ادارے کا نام ضلع، ریاست اور ملک بھر میں روشن کر رہے ہیں۔ ادارہ طلبہ کے روشن مستقبل کے لیے ہر ممکن تعاون فراہم کر رہا ہے۔
اسی طرح ادارے کے معزز چیئرمین جناب ارشد مختار صاحب اور معزز سیکریٹری جناب راشد ارشد مختار صاحب نے طالب علم کو مبارکباد دیتے ہوئے نیک خواہشات کا اظہار کیا۔وہیں ڈگری کالج پرنسپل ڈاکٹر شاہ عقیل احمد، ڈپلومہ کالج پرنسپل ڈاکٹر یعقوب انصاری، ڈین اکیڈمکس ڈاکٹر سلمان بیگ، ڈین ریسرچ ڈاکٹر نوید حسین، ڈین آئی کیو اے سی ڈاکٹر فہد اقبال، ڈین ایڈمیشن ڈاکٹر دلاور حسین اور دیگر اساتذہ نے بھی مبارکباد پیش کی اور نیک خواہشات کا اظہار کیا۔
