درگاپور: نیپالی پاڑہ ہندی ہائی اسکول (ایچ۔ایس)، درگاپور کے ہیڈماسٹر ڈاکٹر کلیم الحق کو نیشنل کونسل فار ٹیچر ایجوکیشن (NCTE) کے ذریعہ مینٹور کے طور پر مقرر کیا گیا ہے۔ یہ تقرری “نیشنل مشن فار مینٹورنگ” کے تحت کی گئی ہے، جو اسکول اساتذہ کے لیے ایک اہم منصوبہ ہے۔ این سی ٹی ای وزارت تعلیم، حکومت ہند کے تحت کام کرتا ہے۔
ڈاکٹر کلیم الحق کا انتخاب ان کی طویل تدریسی تجربے اور تعلیم کے میدان میں شاندار کارناموں کی بنا پر کیا گیا۔ انہیں 2016 میں بردوان ضلع کے “بہترین ہیڈماسٹر ایوارڈ” سے نوازا گیا تھا۔ 2019 میں انہیں مغربی بنگال کی وزیر اعلیٰ کی جانب سے “شکشا رتنا ایوارڈ” ملا اور 2020 میں صدر جمہوریہ ہند نے انہیں “قومی اساتذہ ایوارڈ” سے سرفراز کیا۔
ڈاکٹر حق کے اسکول نیپالی پاڑہ ہندی ہائی اسکول کو بھی کئی اعزازات ملے ہیں، جن میں 2017 میں “ضلع کا بہترین اسکول ایوارڈ” (شیشومتر ودیالیہ پرسکار)، 2019 میں “ریاست کا بہترین اسکول ایوارڈ” (جمینی رائے پرسکار) اور 2022 میں وزارت تعلیم، حکومت ہند کی طرف سے “نیشنل ایوارڈ آف سواچھ ودیالیہ پرسکار” شامل ہیں۔ یہ مغربی بنگال کا واحد اسکول اور ہیڈماسٹر ہیں جنہیں ضلع، ریاست اور قومی سطح پر پہچان ملی ہے۔
مینٹور کے طور پر ڈاکٹر کلیم الحق دیگر اساتذہ کی رہنمائی کریں گے، انہیں تحریک دیں گے اور تربیت فراہم کریں گے تاکہ تعلیم کے معیار کو بہتر بنایا جا سکے۔ ان کی اس تقرری سے قومی تعلیمی نظام کو ایک نئی جہت ملنے کی امید ہے۔
