قومی شاہراہ 19 پر آسنسول شمالی تھانہ کے گارُوئی علاقے میں سوم ار کے دن ایل پی جی سے بھرا ہوا ایک ٹینکر بے قابو ہو کر اُلٹ گیا، جس کے باعث پورے علاقے میں افراتفری مچ گئی۔ ٹینکر میں بھاری مقدار میں پٹرولیم مادہ موجود ہونے کے شبہ کی وجہ سے مقامی لوگوں میں خوف و ہراس پھیل گیا۔ تاہم وقت پر پولیس اور انتظامیہ کی فوری کارروائی سے ایک بڑا حادثہ ٹل گیا۔
عینی شاہدین کے مطابق، ٹینکر صبح کے وقت سڑک پر
تیز رفتاری سے جا رہا تھا۔ اچانک توازن بگڑنے کی وجہ سے وہ اُلٹ گیا اور سڑک پر گیس کا اخراج ہونے لگا۔ گیس کے اخراج سے آگ لگنے اور دھماکے کا خدشہ پیدا ہو گیا۔ مقامی لوگوں نے فوراً پولیس کو اطلاع دی۔ ایک عینی شاہد نے بتایا، “ٹینکر سے گیس لیک ہو رہی تھی، اگر بروقت کارروائی نہ ہوتی تو بڑا حادثہ ہو سکتا تھا۔”
حادثے کی اطلاع ملتے ہی آسنسول شمالی تھانہ کی پولیس، فائر بریگیڈ اور آسنسول میونسپل کارپوریشن کی ٹیمیں موقع پر پہنچ گئیں۔ علاقے کو فوراً گھیر کر سیل کر دیا گیا اور لوگوں کو وہاں سے دور رہنے کی ہدایت دی گئی۔ خبر لکھے جانے تک ٹینکر وہیں پڑا ہوا تھا اور علاقے میں خوف کا ماحول قائم ہے۔
