آسنسول کارپوریشن علاقے کے تحت رانی گنج بورو دفتر کے دائرہ اختیار میں آنے والے وارڈ نمبر 35 کے مکینوں نے کئی ماہ سے پینے کے پانی کی عدم فراہمی کے خلاف شدید احتجاج کرتے ہوئے سڑک جام کر دیا۔ یہ احتجاج قومی شاہراہ کی سروس روڈ پر واقع رانی گنج کے مصروف ترین علاقے منگل پور صنعتی حلقے کے منگل پور موڑ پر کیا گیا۔ مقامی باشندوں کا کہنا ہے کہ صنعتی کارخانوں کی وجہ سے فضائی اور صوتی آلودگی نے پہلے ہی ان کی زندگی اجیرن بنا رکھی ہے، اس کے ساتھ ساتھ پینے کے پانی کی قلت نے ان کے مسائل میں مزید اضافہ کر دیا ہے۔ پورا علاقہ گرد و غبار کی موٹی تہہ سے ڈھک چکا ہے، متعدد تالاب اور آبی ذخائر خشک ہو رہے ہیں جبکہ کئی سرکاری کنوؤں کا پانی بھی خطرناک حد تک نیچے جا چکا ہے۔ علاقے میں واحد سہارا سرکاری نل کا پانی ہے، مگر وہ بھی باقاعدگی سے دستیاب نہیں ہو رہا، جس کے باعث عوام کو شدید دشواریوں کا سامنا ہے۔ لوگوں کو پینے کے صاف پانی کے لیے دوسرے علاقوں میں جا کر گھنٹوں انتظار کرنا پڑتا ہے، جس سے ان کی روزمرہ زندگی بری طرح متاثر ہو رہی ہے۔
اتوار کی صبح تعطیل کے دن علاقہ مکینوں نے اپنے مطالبات کے حق میں منگل پور موڑ کے قریب احتجاجی مظاہرہ کیا۔ اطلاع ملتے ہی وارڈ نمبر 35 کی کونسلر اختر ی خاتون موقع پر پہنچیں، جبکہ رانی گنج بورو دفتر کے چیئرمین مضمل شہزادہ بھی وہاں موجود تھے۔ انہوں نے پانی کے بحران کی وجوہات سے عوام کو آگاہ کیا اور یقین دہانی کرائی کہ جلد از جلد مسئلے کا مستقل حل نکال کر پانی کی فراہمی کو معمول پر لانے کے لیے ضروری اقدامات کیے جائیں گے۔ حکام کی یقین دہانی کے بعد صورتحال معمول پر آ گئی۔
