جمعہ کے روز جموڑیہ اسمبلی حلقہ کے تحت تپسی پنچایت کے ارجن پاڑہ علاقے میں مقامی باشندوں نے تالاب کی صفائی کے مطالبے کو لے کر پتھ شری منصوبے کے تحت جاری سڑک کی تعمیر کا کام روک دیا۔ گاؤں والوں کا الزام ہے کہ ارجن تالاب گزشتہ کئی برسوں سے گندگی اور کچرے سے بھرا ہوا ہے اور اس کی حالت انتہائی خراب ہو چکی ہے۔ مقامی باشندوں نے بتایا کہ یہ گاؤں کا واحد تالاب ہے، جسے گزشتہ تقریباً پانچ برسوں سے صاف یا مرمت نہیں کیا گیا۔ تالاب کا پانی اس قدر آلودہ ہو چکا ہے کہ اس میں نہانا تک ممکن نہیں رہا ہے۔ گاؤں والوں کا کہنا ہے کہ انہوں نے بارہا پنچایت پردھان اور دیگر متعلقہ حکام سے تالاب کی صفائی کی درخواست کی، لیکن آج تک کوئی عملی قدم نہیں اٹھایا گیا۔ اسی ناراضگی کے تحت انہوں نے واضح کر دیا کہ جب تک تالاب کی صفائی نہیں کی جاتی، وہ سڑک کی تعمیر کا کام شروع نہیں ہونے دیں گے۔ ان کا کہنا ہے کہ سڑک بھی ضروری ہے اور تالاب بھی، مگر پہلے تالاب بعد میں سڑک۔
دوسری جانب اس معاملے پر جنگلات و اراضی کے کرمادھکش جگن ناتھ نے کہا کہ جس سڑک کی تعمیر ہو رہی ہے وہ پتھ شری منصوبے کے تحت ہے اور اس کا افتتاح پہلے ہی ہو چکا ہے۔ انہوں نے کہا کہ تالاب کی مرمت کے مطالبے پر سڑک کے کام میں رکاوٹ ڈالنا درست نہیں ہے۔ ان کے مطابق یہ تالاب ای سی ایل کی جانب سے کاٹا گیا تھا اور ای سی ایل ہی اس کی صفائی کرے گا۔ اس سلسلے میں بات چیت ہو چکی ہے۔ انہوں نے مزید کہا کہ تالاب کی مرمت بھی ضروری ہے اور سڑک کی تعمیر بھی، لیکن اگر سرکاری منصوبے کے تحت سڑک کا کام مکمل نہ ہوا تو اس کے لیے منظور شدہ رقم واپس چلی جائے گی۔ انتظامیہ کا کہنا ہے کہ دونوں مسائل کا حل نکالنے کی کوشش کی جا رہی ہے تاکہ عوام کو کسی قسم کی پریشانی نہ ہو۔
