کلٹی تھانہ کے نعمت پور علاقے میں بابا صاحب ڈاکٹر بھیم راؤ امبیڈکر کی مجسمہ تنصیب کو لے کر سیاسی رسہ کشی تیز ہو گئی ہے۔ اس معاملے میں بھارتیہ جنتا پارٹی اور ترنمول کانگریس آمنے سامنے آ گئی ہیں۔گزشتہ روز کلٹی کے بی جے پی رکن اسمبلی ڈاکٹر اجئے پوڈدار نے اعلان کیا تھا کہ آئندہ 20 تاریخ کو نیو روڈ، نعمت پور علاقے میں سیل آئی ایس پی کے سی ایس آر فنڈ سے بابا صاحب ڈاکٹر بھیم راؤ امبیڈکر کی مجسمہ نصب کی جائے گی۔ تاہم آج آسنسول میونسپل کارپوریشن کی ایم ایم آئی سی اندرانی مشرا کی قیادت میں ٹی ایم سی کارکنان نے اسی مقام پر مجسمہ تنصیب کے کام کا سنگ بنیاد رکھ دیا۔ اس سلسلے میں اندرانی مشرا نے میڈیا سے گفتگو کرتے ہوئے کہا کہ بی جے پی رکن اسمبلی کے اعلان سے پہلے ہی ٹی ایم سی کی جانب سے یہاں بابا صاحب کی مجسمہ نصب کرنے کا فیصلہ کیا جا چکا تھا، لیکن سیل آئی ایس پی کی طرف سے سیاسی وجوہات کی بنا پر اجازت نہیں دی جا رہی تھی۔ انہوں نے کہا کہ صرف مجسمہ نصب کرنا کافی نہیں، بلکہ بابا صاحب کے نظریات اور آئین پر عمل کرنا زیادہ ضروری ہے۔ انہوں نے افسوس کا اظہار کرتے ہوئے کہا کہ نہ صرف بنگال بلکہ پورے ملک میں بابا صاحب کے آئین کی خلاف ورزی کی جا رہی ہے۔ ان کا کہنا تھا کہ بی جے پی آئین کا نام تو لیتی ہے، مگر اس پر عمل نہیں کرتی اور قدم قدم پر آئینی اصولوں کی خلاف ورزی کی جاتی ہے۔
اندرانی مشرا نے امید ظاہر کی کہ اس بار سیل آئی ایس پی مجسمہ تنصیب کے معاملے میں کسی قسم کی سیاست نہیں کرے گا اور علاقے میں جلد ہی بابا صاحب ڈاکٹر بھیم راؤ امبیڈکر کی مجسمہ نصب کی جائے گی۔
