بالاسور 16 نومبر: آج شام 5 بجے مقامی کلکٹر کے آڈیٹوریم میں ضلع کلکٹر جناب سوریا بنشی مَیور وکاش کی صدارت میں ضلع سطحی قومی پریس ڈے کا انعقاد کیا گیا۔اس پروگرام میں مہمانِ خصوصی کی حیثیت سے بالاسور کے معزز رکنِ پارلیمنٹ جناب پرتاپ چندر سارنگی موجود تھے، جبکہ معزز مہمانانِ گرامی میں بالاسور میونسپلٹی کی چیئرپرسن محترمہ سبیتا ساہو، مہمانِ مقرر کی حیثیت سے بالاسور صدر کے ایم ایل اے جناب مانس کمار داتّا، ایڈیشنل کلکٹر (جنرل) جناب سودھاکر نائک، سینئر صحافی جناب اُجول کر اور سرکاری تسلیم شدہ صحافی جناب رام نارائن شَتَپتھی اسٹیج پر تشریف فرما تھے۔پروگرام کا آغاز بھگوان جگن ناتھ کی تصویر کے سامنے دیپ اور پھول نذر کرنے سے ہوا۔ اس کے بعد ضلع اطلاعات و تعلقاتِ عامہ کے افسر جناب پریہ درشی راجیش نے مہمانوں کا تعارف، خیرمقدمی خطاب اور پریس ڈے کی اہمیت پر تفصیلی روشنی ڈالی۔ایڈیشنل کلکٹر جناب سودھاکر نائک نے پریس کونسل آف انڈیا, پریس کمیشن, اور کارپس فنڈ سے متعلق خصوصی گفتگو کی۔ضلع کلکٹر جناب سوریا بنشی مَیور وکاش نے اپنے خطاب میں کہا کہ موجودہ دور میں صحافیوں کا کردار انتہائی اہم ہے۔ سماجی، معاشی اور سیاسی اطلاعات معاشرے کے لیے آئینہ کی حیثیت رکھتی ہیں۔ پرنٹ، الیکٹرانک اور سوشل میڈیا سبھی کو چاہیے کہ صحیح اور مستند خبریں فراہم کر کے عوامی خدمت میں اپنی ذمہ داری نبھائیں۔سینئر صحافی جناب اُجول کر اور جناب رام نارائن شَتَپتھی نے اپنی صحافتی تجربات حاضرین کے ساتھ شیئر کیے۔مہمانِ خصوصی معزز رکنِ پارلیمنٹ جناب پرتاپ چندر سارنگی نے اپنے خطاب میں کہا کہ صحافت جمہوریت کا چوتھا ستون ہے۔ قلم کی طاقت تلوار سے بڑھ کر ہے، اس لیے صحافیوں کو کسی بیرونی دباؤ میں آئے بغیر اپنے فرائض دیانت داری سے انجام دینے چاہیئے۔مہمانِ مقرر بالاسور صدر کے ایم ایل اے جناب مانس کمار داتّا نے آج کے مرکزی موضوع “گمراہ کن خبروں کے پھیلاؤ کے پس منظر میں میڈیا کی شاخ کا تحفظ” پر تفصیلی روشنی ڈالی۔ انہوں نے مثبت و منفی دونوں خبروں کو ذمہ داری کے ساتھ پیش کرنے کی تلقین کی اور صحافیوں کو ’’تاج کے بغیر بادشاہ‘‘ قرار دیا۔اس موقع پر دو صحافیوں کو ان کی نمایاں خدمات کے اعتراف میں توصیفی اسناد دی گئیں اور ریاستی حکومت کی جانب سے صحافیوں کو ہیلتھ کارڈز بھی تقسیم کیے گئے۔آخر میں ضلع انتظامیہ کی جانب سے سب ڈویژنل انفارمیشن اینڈ پبلک ریلیشنز آفیسر جناب گوبر دھن بشوال نے تمام شرکاء کا شکریہ ادا کیا۔بالاسور سے عظیم بالیسری کی رپورٹ۔
