شہر کے مصروف ترین علاقے بستن بازار میں آج دوپہر اچانک بجلی کے کھمبے میں شارٹ سرکٹ کے سبب آگ بھڑک اٹھی۔ آگ لگتے ہی پورے علاقے میں افرا تفری مچ گئی۔ اطلاع ملتے ہی پولیس اور فائر بریگیڈ کی ٹیم موقع پر پہنچی اور کافی جدوجہد کے بعد آگ پر قابو پایا گیا۔
مقامی لوگوں کا کہنا ہے کہ اس علاقے میں اس سے پہلے بھی آگ لگنے کے کئی واقعات ہو چکے ہیں، جس کی وجہ سے دکانداروں میں دہشت کا ماحول پایا جاتا ہے۔ تاہم، اس کے باوجود بازار میں بڑھتے ہوئے تجاوزات پر نہ تو انتظامیہ کی کوئی سنجیدگی نظر آ رہی ہے اور نہ ہی دکاندار اس سلسلے میں کچھ کر پا رہے ہیں۔
عینی شاہدین کے مطابق جیسے ہی آگ بھڑکی، لوگ اپنی دکانیں چھوڑ کر باہر نکل آئے اور ماحول میں کھلبلی مچ گئی۔ دکانداروں نے خدشہ ظاہر کیا کہ چونکہ قریب ہی تہوار ہے اور ان دنوں بازار میں رش بڑھ جاتا ہے، اس طرح کے واقعات کسی بڑے سانحہ کو جنم دے سکتے ہیں۔
