جموڑیہ صنعتی حلقہ کے شیخپور واقع ایک نجی کارخانے میں منگل کی صبح ایک دردناک حادثہ پیش آیا۔ کام کے دوران پیش آئے اس حادثے میں ایک مزدور کی موت ہوگئی۔ متوفی کی شناخت جموڑیہ کے چرولیا باشندہ کیشو باؤری کے طور پر کی گئی ہے۔ حادثے کے بعد ساتھی مزدوروں نے کارخانے میں حفاظتی انتظامات کی شدید کمی کا الزام عائد کیا۔ ان کا کہنا ہے کہ اگر مناسب حفاظتی آلات اور احتیاطی تدابیر اختیار کی جاتیں تو یہ سانحہ روکا جا سکتا تھا۔ حادثے کی اطلاع ملتے ہی متوفی کے ساتھی مزدور اور مقامی مزدور تنظیموں کے ارکان کارخانے کے مرکزی دروازے پر جمع ہوگئے اور احتجاج کرتے ہوئے مہلوک کے اہلِ خانہ کو مناسب معاوضہ اور مالی امداد فراہم کرنے کا مطالبہ کیا۔ اطلاع ملتے ہی پولیس اور انتظامیہ کے افسران موقع پر پہنچ گئے اور حالات کو قابو میں کرنے کی کوشش کی۔
