برن پور : ہیراپور تھانہ کے تحت برن پور میں ایک دلخراش واقعہ پیش آیا ہے۔ دوستوں کے ساتھ دامودر ندی میں نہانے گئے دو نوجوانوں کی ڈوبنے سے موت ہو گئی، جبکہ دیگر چار نوجوان بال بال بچ گئے۔ یہ واقعہ پیر کی دوپہر برن پور کے بھوتناتھ مندر کے قریب پیش آیا۔
مرنے والوں کی شناخت برن پور کے نرسنگھ باندھ ساؤ روڈ کے رہائشی رمن دیپ ملہوترا (20) اور نرسنگھ بندھ مٹھائی گلی کے رہائشی امیت داس (21) کے طور پر کی گئی ہے۔ ان میں سے ایک نے اسی سال ہائر سیکنڈری امتحان دیا تھا۔ پیر کی شام دونوں لاشوں کا پوسٹ مارٹم آسنسول ڈسٹرکٹ اسپتال میں کیا گیا۔ واقعے کے بعد نرسنگھ بندھ علاقے میں غم کی لہر دوڑ گئی ہے۔پولیس ذرائع کے مطابق پیر کی صبح آسنسول میونسپل کارپوریشن کے وارڈ نمبر 77 کے نرسنگھ بندھ علاقے سے تقریباً چھ نوجوان بھوتناتھ مندر کے قریب دامودر ندی میں نہانے گئے تھے۔ دوپہر کے وقت نہاتے ہوئے رمن دیپ ملہوترا اور امیت داس ندی میں ڈوب گئے۔ باقی چار کسی طرح باہر نکلنے میں کامیاب ہو گئے۔ ان کی چیخ و پکار سن کر قریب نہا رہے لوگ اور مقامی افراد موقع پر پہنچے۔ اطلاع ملنے پر ہیراپور تھانہ کی پولیس اور بچوں کے اہل خانہ بھی وہاں پہنچے۔
تقریباً تین بجے تک جاری رہنے والی تلاشی کے بعد دونوں نوجوانوں کو بے ہوشی کی حالت میں ندی سے نکالا گیا اور فوراً آسن سول ضلع اسپتال لے جایا گیا، جہاں ڈاکٹروں نے انہیں مردہ قرار دے دیا۔
وارڈ نمبر 77 کے کونسلر گرمیت سنگھ نے بتایا کہ نرسنگھ بندھ کے چھ نوجوان، جو آپس میں دوست تھے، صبح دامودر ندی میں نہانے گئے تھے، جہاں یہ حادثہ پیش آیا۔
پولیس کے ایک افسر نے کہا: “چھ دوست ندی میں نہانے گئے تھے، جن میں سے دو کی ڈوبنے سے موت ہو گئی۔”
قابلِ ذکر ہے کہ چار دن قبل بھی جمودیہ کے ایک ای سی ایل ملازم کی رانی گنج میں دامودر ندی میں نہاتے وقت ڈوبنے سے موت ہو گئی تھی، اور دو دن بعد اس کی لاش برآمد ہوئی تھی۔
