درگاپور کے 54 فٹ علاقے میں واقع چین میدان میں کرکٹ کھیل کو لے کر اتوار کو زبردست کشیدگی پیدا ہو گئی۔ الزام ہے کہ ایک خاتون اسکوٹی لے کر اچانک کھیل کے میدان کے کرکٹ پچ تک پہنچ گئیں، جس کے بعد تنازع شروع ہو گیا۔
عینی شاہدین کے مطابق خاتون کو لے کر میدان میں موجود لوگوں کے ساتھ بحث و تکرار شروع ہوئی جو دیکھتے ہی دیکھتے ہاتھا پائی تک پہنچ گئی۔ اطلاع ملنے پر درگاپور تھانہ پولیس موقع پر پہنچی اور حالات کو قابو میں کرنے کی کوشش کی، لیکن اس دوران پولیس اور مقامی لوگوں کے درمیان بھی تلخ کلامی ہو گئی۔ پولیس ذرائع کے مطابق اس ہنگامے میں دو خاتون پولیس اہلکار شدید زخمی ہو گئیں۔ دونوں کو علاج کے لیے گاندھی موڑ سپر اسپیشلٹی اسپتال میں داخل کرایا گیا ہے۔ حالات کو قابو میں کرنے کے لیے علاقے میں بھاری پولیس فورس تعینات کر دی گئی۔ قابل ذکر ہے کہ چین میدان میں ان دنوں ایک ناک آؤٹ یادگاری کرکٹ ٹورنامنٹ جاری ہے۔ ٹورنامنٹ کے دوسرے ہی دن اس واقعے کے بعد پورے علاقے میں سنسنی پھیل گئی۔
ٹورنامنٹ کے منتظم رانا شکدر نے بتایا کہ خاتون کے شوہر پہلے چار پہیہ گاڑی لے کر وہاں سے گزر رہے تھے، اسی دوران کسی بات پر تکرار شروع ہوئی۔ بعد میں مذکورہ خاتون اسکوٹی لے کر سیدھا کرکٹ پچ تک پہنچ گئیں، جس سے تنازع مزید بڑھ گیا۔ انہوں نے کہا کہ جب صورتحال بگڑنے لگی تو پولیس کو اطلاع دی گئی، مگر خاتون کو پچ سے ہٹانے کے دوران مقامی لوگوں اور خاتون کے درمیان شدید جھگڑا شروع ہو گیا، جس کے دوران دو خاتون پولیس اہلکار زخمی ہو گئیں۔ انہوں نے مزید کہا کہ منتظمین پولیس کی مکمل مدد کر رہے ہیں اور جو بھی اس واقعے کے ذمہ دار ہیں ان کے خلاف سخت کارروائی کا مطالبہ کرتے ہیں۔
