دُرگاپور اسٹیل پلانٹ میں ایک بار پھر سنگین حادثہ پیش آیا ہے۔ بلاسٹ فرنس سے زہریلی گیس کے اخراج کے سبب 6 مستقل ملازمین بیمار ہو گئے، جن میں سے 2 کی حالت تشویشناک بتائی جا رہی ہے۔ دونوں کو آئی سی یو میں داخل کیا گیا ہے۔
ذرائع کے مطابق واقعہ راء میٹریئل ہینڈلنگ پلانٹ (Raw Material Handling Plant) کے آپریشن سیکشن میں پیش آیا۔ جمعہ کی صبح تقریباً ساڑھے گیارہ بجے اچانک بلاسٹ فرنس سے زہریلی گیس کا اخراج شروع ہوگیا۔ اُس وقت وہاں کام میں مصروف 6 مزدور گیس کی زد میں آگئے۔
متاثرہ افراد کو فوراً پلانٹ میڈیکل سینٹر منتقل کیا گیا، جہاں ابتدائی طبی امداد کے بعد 4 مزدوروں کو فارغ کر دیا گیا۔ تاہم، اُجول ہاڑی اور تاپس منڈل نامی دو ملازمین کی حالت بگڑ جانے پر انہیں مرکزی اسپتال بھیجا گیا، جہاں فی الحال ان کا علاج آئی سی یو میں جاری ہے۔
حادثے کی خبر جنگل کی آگ کی طرح پلانٹ میں پھیل گئی، جس سے مزدوروں میں خوف و ہراس پیدا ہوگیا۔ موقع پر ہنگامہ آرائی اور احتجاج بھی دیکھنے میں آیا۔ مزدوروں نے فیکٹری انتظامیہ پر لاپرواہی کا الزام عائد کرتے ہوئے کہا کہ بار بار حفاظتی اصولوں کی خلاف ورزی کے باعث ہی ایسے واقعات پیش آ رہے ہیں۔
مزدور تنظیموں کا کہنا ہے کہ اگر باقاعدہ حفاظتی جانچ اور مرمت کا نظام نہیں اپنایا گیا تو مستقبل میں اس سے بھی بڑے حادثات کا خدشہ برقرار رہے گا۔
انتظامیہ نے واقعے کی تحقیقات شروع کر دی ہے، تاہم مزدوروں کی بے چینی بدستور برقرار ہے۔
