دُرگاپور، مغربی بردوان ضلع میں اُس وقت سنسنی پھیل گئی جب سنٹرل انویسٹی گیشن ایجنسی انفورسمنٹ ڈائریکٹوریٹ (ای ڈی) کی ٹیم نے بُدبُد پولیس اسٹیشن کے نئے او سی منورنجن منڈل کے رہائشی مکان پر چھاپہ مارا۔ یہ کارروائی غیر قانونی کوئلہ اسمگلنگ سے جڑے ایک معاملے میں کی جا رہی ہے۔
ذرائع کے مطابق، انفورسمنٹ ڈائریکٹوریٹ کی ٹیم صبح سے ہی مغربی بردوان ضلع کے مختلف علاقوں میں ایک ساتھ چھاپہ ماری کر رہی ہے۔ اسی سلسلے میں ای ڈی کے افسران بُدبُد پولیس اسٹیشن کے نئے او سی منورنجن منڈل کے گھر پہنچے، جہاں تاحال تلاشی مہم جاری ہے۔
اطلاعات کے مطابق، ای ڈی کی ٹیم مکان میں موجود اہم دستاویزات اور مالی لین دین سے متعلق کاغذات کی باریک بینی سے جانچ کر رہی ہے۔ کارروائی کے دوران سکیورٹی کے پیشِ نظر مکان کے باہر مرکزی فورس کے جوان تعینات کیے گئے ہیں۔
قابلِ ذکر ہے کہ منورنجن منڈل کو چند ماہ قبل معطل کیا گیا تھا، بعد ازاں انہیں آسنسول– دُرگاپور پولیس کمشنریٹ کی اسپیشل برانچ کی ذمہ داری سونپی گئی تھی۔ حال ہی میں ان کی تقرری بُدبُد پولیس اسٹیشن کے او سی کے طور پر ہوئی تھی، تاہم وہ ابھی تک باضابطہ طور پر عہدے کا چارج نہیں سنبھال سکے تھے۔
چارج سنبھالنے سے قبل ہی ای ڈی کی اس کارروائی نے کئی سوالات کھڑے کر دیے ہیں اور پورے ضلع میں چرچا کا ماحول بنا ہوا ہے۔ ذرائع کا یہ بھی کہنا ہے کہ ای ڈی کی چھاپہ ماری صرف منورنجن منڈل کے گھر تک محدود نہیں ہے، بلکہ مغربی بردوان کے مختلف حصوں میں کوئلہ اور ریت کے کاروبار سے وابستہ کئی تاجروں کے ٹھکانوں پر بھی بیک وقت تلاشی مہم چلائی جا رہی ہے۔
ضلع کے کئی علاقوں میں اس کارروائی کو لے کر کشیدگی اور تجسس دونوں کی فضا قائم ہے۔ فی الحال اس پورے آپریشن کی وجوہات اور تفتیش کے دائرے سے متعلق ای ڈی کی جانب سے کوئی باضابطہ بیان جاری نہیں کیا گیا ہے، تاہم ماہرین کا ماننا ہے کہ یہ کارروائی کوئلہ اور ریت سے جڑی مبینہ مالی بے ضابطگیوں کی جانچ کا حصہ ہو سکتی ہے۔
