*سماجی کارکن فیروز خان (ایف کے) کا وزیراعلیٰ ممتا بنرجی کو خط، پولیس کمشنر سنیل کمار چودھری کے لیے ریاستی تمغۂ شجاعت کا مطالبہ*
آسنسول 4 مارچ : آسنسول سے تعلق رکھنے والے معروف سماجی کارکن فیروز خان (ایف کے) نے مغربی بنگال کی وزیر اعلیٰ ممتا بنرجی کو ایک باضابطہ مکتوب روانہ کرتے ہوئے آسنسول-درگاپور پولیس کمشنریٹ کے کمشنر سنیل کمار چودھری (آئی پی ایس) کی شاندار خدمات کو سراہا ہے اور انہیں ریاستی تمغۂ شجاعت سے نوازنے کا مطالبہ کیا ہے۔
اپنے خط میں فیروز خان (ایف کے) نے تحریر کیا کہ 02 اگست 2023 کو عہدہ سنبھالنے کے بعد سے سنیل کمار چودھری نے آسنسول-درگاپور خطے میں قانون و انتظام کو مؤثر اور مضبوط بنانے میں نمایاں کردار ادا کیا ہے۔ ان کی قیادت میں علاقے میں امن، تحفظ اور نظم و ضبط کا ماحول قائم ہوا ہے جس کا مثبت اثر عوامی زندگی پر صاف دکھائی دیتا ہے۔ انہوں نے مزید لکھا کہ آج تمام مذاہب اور برادریوں کے لوگ اپنے اپنے تہوار خوشی، سکون اور بلا خوف و خطر منا رہے ہیں۔ علاقے میں فرقہ وارانہ ہم آہنگی اور باہمی بھائی چارے کو فروغ ملا ہے، جو کسی بھی مہذب معاشرے کی بنیادی پہچان ہے۔ فیروز خان (ایف کے) کے مطابق عام شہری خود کو پہلے کے مقابلے زیادہ محفوظ محسوس کر رہے ہیں اور پولیس محکمہ پر عوام کا اعتماد قابلِ ذکر حد تک بڑھا ہے۔ کسی بھی ناخوشگوار واقعے پر فوری اور سخت کارروائی عمل میں لائی جاتی ہے، مجرموں کی جلد گرفتاری یقینی بنائی جاتی ہے اور قانون کا نفاذ بلا خوف و رعایت کیا جاتا ہے۔ انہوں نے اپنے مکتوب میں یہ بھی نشاندہی کی کہ سماج دشمن عناصر اور منظم جرائم کے خلاف سخت اقدامات اٹھائے جا رہے ہیں، جس کے باعث علاقے میں امن و امان کی صورتحال مستحکم ہے۔ ان تمام خدمات اور مثالی قیادت کو سراہتے ہوئے فیروز خان (ایف کے) نے وزیر اعلیٰ ممتا بنرجی سے پرزور اپیل کی ہے کہ سنیل کمار چودھری (آئی پی ایس) کو قانون و انتظام کی مضبوطی اور عوامی تحفظ کے میدان میں نمایاں خدمات کے اعتراف میں ریاستی تمغۂ شجاعت سے نوازا جائے۔
