آسنسول کے ایتھوڑا پل کے نیچے واقع 19 نمبر نیشنل ہائی وے کی سروس روڈ پر ایک بار پھر سڑک بیٹھنے کا واقعہ پیش آیا، جس سے علاقے میں سنسنی پھیل گئی ہے۔ مقامی لوگوں اور مسافروں میں خوف و ہراس کا ماحول بن گیا ہے۔ اس سے پہلے نیشنل ہائی وے پر لگاتار دو بار سڑک دھنسنے کے واقعات سامنے آچکے ہیں۔
سڑک کے بیٹھنے کی اطلاع ملتے ہی نیشنل ہائی وے اتھارٹی کے افسران موقع پر پہنچے اور متاثرہ حصے کو گارڈ وال لگا کر گھیر دیا گیا۔ بار بار سڑک بیٹھنے کے ان واقعات نے گاڑی چلانے والوں کو بھی تشویش میں مبتلا کردیا ہے۔ مقامی لوگوں کا کہنا ہے کہ اگر رات کے وقت کوئی بڑی گاڑی یا اسکولی بس یہاں سے گزرتی تو بڑا حادثہ ہوسکتا تھا۔
مقامی باشندہ سادھن دتہ نے میڈیا سے بات کرتے ہوئے کہا:
“ہم مسلسل خوف میں مبتلا ہیں، روز مرہ کی آمدورفت متاثر ہورہی ہے۔ انتظامیہ کو سنجیدگی سے اس کا مستقل حل نکالنا ہوگا۔”
عوام کی جانب سے یہ سوال بھی اٹھایا جا رہا ہے کہ آخر بار بار سڑک کیوں بیٹھ رہی ہے؟ کیا تعمیراتی معیار میں کوتاہی برتی گئی ہے یا زمین کے نیچے کوئی بڑا مسئلہ موجود ہے؟
اس معاملے پر نیشنل ہائی وے کے روڈ پروٹیکشن آفیسر رنجیت چٹرجی نے بتایا:
“اس علاقے کی زمین کے نیچے پی ایچ ای (PHE) کی پائپ لائن گزرتی ہے جس کی وجہ سے مٹی پہلے سے ہی نرم ہے، اور حالیہ شدید بارشوں کے باعث زمین مزید کمزور ہو گئی ہے۔ ہمارا ماننا ہے کہ یہی وجہ ہے کہ سڑک بار بار بیٹھ رہی ہے۔”
فی الحال سڑک کی مرمت کا کام شروع نہیں کیا گیا ہے، لیکن عوام مطالبہ کر رہے ہیں کہ نیشنل ہائی وے اتھارٹی اور ضلع انتظامیہ فوری طور پر اس مسئلے کا پائیدار حل تلاش کرے تاکہ مستقبل میں کوئی بڑا حادثہ رونما نہ ہو۔
