وزیر اعلیٰ ممتا بنرجی کی سپریم کورٹ میں جاری قانونی جدوجہد کا خیر مقدم کرتے ہوئے درگاپور میں جمعرات کے روز ترنمول کانگریس سے وابستہ وکلاء نے ایک ریلی نکالی۔ یہ ریلی دوپہر کے وقت درگاپور سب ڈویژنل کورٹ احاطے میں منعقد ہوئی۔
ریلی کی قیادت سابق کونسلر اور سابق بار ایسوسی ایشن صدر دیب برت سائیں نے کی۔ اس موقع پر ضلع پریشد کی کرمادھیکشہ بیشاکھی بندوپادھیائے، یوتھ ترنمول کے صدر منوج چند سمیت متعدد ترنمول حامی وکلاء موجود تھے۔ وکلاء کا کہنا تھا کہ ایس آئی آر معاملے میں وزیر اعلیٰ ممتا بنرجی نے عام لوگوں کے مفاد میں سپریم کورٹ میں قانونی لڑائی لڑی ہے اور اس اقدام کے ذریعے انہوں نے ایک بار پھر بنگال کے عوام کے ساتھ کھڑے ہونے کا پیغام دیا ہے۔ ریلی سے خطاب کرتے ہوئے دیب برت سائیں نے کہا، “وزیر اعلیٰ نے ایک بار پھر ثابت کیا ہے کہ وہ بنگال کے عوام کے ساتھ ہیں اور جدوجہد ہی ان کی سیاست کی اصل طاقت ہے۔” ریلی کے باعث کچھ دیر کے لیے درگاپور عدالت احاطے میں سیاسی سرگرمیوں میں اضافہ دیکھا گیا۔
