درگاپور شہر کے امرائی علاقے میں ہولی کی خوشیاں اس وقت ماتم میں بدل گئیں جب تالاب میں نہانے کے دوران دو نوجوان ڈوب کر جاں بحق ہوگئے۔ افسوسناک واقعہ امرائی کے رِشی اربندو نگر میں پیش آیا جس کے بعد پورے علاقے میں سنسنی پھیل گئی۔ مقامی ذرائع کے مطابق ہولی کی صبح سے ہی نوجوان رنگ کھیلنے میں مصروف تھے۔ دوپہر کے وقت چند نوجوان ایک ساتھ قریبی تالاب میں نہانے کے لیے اترے۔ اسی دوران دو نوجوان گہرے پانی میں چلے گئے اور تیرنا نہ جاننے کے باعث ڈوبنے لگے۔ مہلوکین کی شناخت وشال سنگھ (18) اور دیو دت گوسوامی (19) کے طور پر ہوئی ہے۔ دونوں امرائی کے رِشی اربندو نگر کے رہائشی بتائے جاتے ہیں۔ ساتھی نوجوانوں نے انہیں بچانے کی کوشش کی لیکن ناکام رہے۔ بعد ازاں مقامی لوگ بڑی تعداد میں جمع ہوگئے اور تلاش شروع کی گئی۔ کافی جدوجہد کے بعد دونوں نوجوانوں کو نکال کر تشویشناک حالت میں درگاپور اسٹیل پلانٹ اسپتال لے جایا گیا، جہاں ڈاکٹروں نے انہیں مردہ قرار دے دیا۔
واقعے کے عینی شاہد آکاش سریواستو نامی ایک دوست نے بتایا، “ہم نے طے کیا تھا کہ رنگ کھیلنے کے بعد تالاب میں نہانے جائیں گے۔ چار دوست پانی میں اترے تھے۔ اچانک دو دوست ڈوبنے لگے۔ مقامی لوگوں نے بچانے کی کوشش کی، مگر ہم انہیں نہ بچا سکے۔ یقین نہیں ہوتا کہ خوشی کا دن اس طرح غم میں بدل جائے گا۔” اس دلخراش حادثے کے بعد پورے علاقے میں غم کی فضا قائم ہے اور اہلِ خانہ پر قیامت ٹوٹ پڑی ہے۔ پولیس نے واقعے کی جانچ شروع کر دی ہے۔
