*یوگی آدتیہ ناتھ کے غیر ملکی دورے سے اتر پردیش کو ملی عالمی شناخت: ڈاکٹر عمار رضوی*
لکھنؤ۔ (پریس ریلیز/ابوشحمہ انصاری) اتر پردیش کے سابق کارگزار وزیر اعلیٰ اور آل انڈیا مائنارٹیز فورم فار ڈیموکریسی کے قومی صدر ڈاکٹر عمار رضوی نے ریاست کے وزیر اعلیٰ یوگی آدتیہ ناتھ کو ہولی کے پُرمسرت موقع پر دلی مبارکباد اور نیک خواہشات پیش کی ہیں۔ اپنے تہنیتی پیغام میں ڈاکٹر رضوی نے وزیر اعلیٰ یوگی آدتیہ ناتھ کے سنگاپور اور جاپان کے چار روزہ غیر ملکی دورے کی کامیابی پر مسرت کا اظہار کرتے ہوئے اسے اتر پردیش کی ترقی کی سمت میں ایک اہم سنگِ میل قرار دیا۔
ڈاکٹر رضوی نے اپنے پیغام میں کہا کہ غیر ملکی دورے کے دوران ہندوستانی نژاد افراد کی جانب سے وزیر اعلیٰ یوگی آدتیہ ناتھ کا جس گرمجوشی کے ساتھ استقبال کیا گیا، اس سے یہ بات واضح ہو گئی کہ ان کی مقبولیت اور شہرت صرف ہندوستان تک محدود نہیں بلکہ بین الاقوامی سطح پر بھی ان کی شناخت مضبوط ہوئی ہے۔ انہوں نے کہا کہ اتر پردیش کے باشندے خود کو خوش نصیب سمجھتے ہیں کہ ریاست کو یوگی آدتیہ ناتھ جیسے ترقی پسند رہنما کی قیادت حاصل ہے، جنہوں نے اقتدار سنبھالتے ہی ریاست کو ترقی یافتہ صوبوں کی صفِ اوّل میں لانے کا عزم کیا۔
انہوں نے مزید کہا کہ وزیر اعلیٰ یوگی آدتیہ ناتھ کی قیادت میں سنگاپور اور جاپان کے ساتھ تقریباً ڈیڑھ لاکھ کروڑ روپے کے مفاہمتی معاہدوں (ایم او یو) پر دستخط اور تقریباً ڈھائی لاکھ کروڑ روپے کی سرمایہ کاری کی تجاویز موصول ہونا ریاستی معیشت کی مضبوطی کا واضح ثبوت ہے۔ ان سرمایہ کاری منصوبوں کے ذریعے ریاست کے تقریباً پانچ لاکھ نوجوانوں کے لیے روزگار کے نئے مواقع پیدا ہوں گے، جو اتر پردیش کی اقتصادی ترقی کو نئی رفتار فراہم کریں گے۔
ڈاکٹر رضوی نے کہا کہ ریاست میں تیزی سے فروغ پاتا بنیادی ڈھانچہ اور یوگی آدتیہ ناتھ کی قیادت میں بہتر ہوتی قانون و انتظام کی صورتحال ہی وہ عوامل ہیں جن کی بدولت آج غیر ملکی سرمایہ کار اتر پردیش میں سرمایہ کاری کے لیے آگے آ رہے ہیں۔ انہوں نے وزیر اعلیٰ یوگی آدتیہ ناتھ اور ان کے ہمراہ گئے وفد کے تمام اراکین کو اس کامیاب غیر ملکی دورے پر دل کی گہرائیوں سے مبارکباد پیش کی۔
اپنے پیغام کے اختتام پر ڈاکٹر عمار رضوی نے امید ظاہر کی کہ وزیر اعلیٰ یوگی آدتیہ ناتھ کی قیادت میں اتر پردیش ترقی کے نئے باب رقم کرتے ہوئے ملک کی صفِ اوّل کی ترقی یافتہ ریاستوں میں اپنا نمایاں مقام ضرور حاصل کرے گا۔یہ اطلاع آل انڈیا مائناریٹیز فورم فار ڈیموکریسی کے شعبۂ نشر و اشاعت کے سیکریٹری ابوشحمہ انصاری نے فراہم کی۔
