آنے والے 2026 کے اسمبلی انتخابات کو مدنظر رکھتے ہوئے ترنمول کانگریس نے تنظیمی ڈھانچے کو مزید مضبوط بنانے کی سمت ایک اہم قدم اٹھایا ہے۔ پارٹی کی جانب سے مغربی بردوان ضلع کی نو اسمبلی نشستوں کے لیے چار اسمبلی کوآرڈینیٹروں کا تقرر کیا گیا ہے۔ پارٹی ذرائع کے مطابق ان تقرریوں کا مقصد نچلی سطح پر تنظیم کو فعال کرنا، بوتھ سطح تک بہتر تال میل قائم کرنا اور انتخابات سے قبل تنظیمی سرگرمیوں میں تیزی لانا ہے۔ قیادت کا ماننا ہے کہ تجربہ کار رہنماؤں کو یہ ذمہ داریاں سونپنے سے تنظیم کو تقویت ملے گی اور کارکنان میں نئی توانائی پیدا ہوگی۔ تقرریوں کی تفصیل کے مطابق درگاپور مشرق اور درگاپور مغرب اسمبلی حلقوں کی ذمہ داری ریاستی وزیر پردیپ مجمدار کو دی گئی ہے۔ کلٹی اور آسنسول نارتھ اسمبلی حلقوں کے لیے ریاستی وزیر ملئے گھٹک کو اسمبلی کوآرڈینیٹر مقرر کیا گیا ہے۔ بارابنی، جموڑیا اور پانڈیشور اسمبلی حلقوں کی نگرانی ریاستی رہنما وی۔ شیوداسن داسو کے سپرد کی گئی ہے، جبکہ رانی گنج اور آسنسول ساؤتھ اسمبلی حلقوں کے لیے رانی گنج کے ایم ایل اے تاپش بنرجی کو کوآرڈینیٹر بنایا گیا ہے۔ ترنمول کانگریس کی قیادت کا کہنا ہے کہ ان تقرریوں کے بعد اسمبلی سطح پر اجلاسوں، عوامی رابطہ مہمات اور تنظیمی جائزہ پروگراموں میں تیزی لائی جائے گی۔ سیاسی تجزیہ کاروں کے مطابق ان اقدامات سے واضح ہوتا ہے کہ ترنمول کانگریس نے 2026 کے اسمبلی انتخابات کے لیے ابھی سے پوری طرح انتخابی موڈ اختیار کر لیا ہے۔
