آسنسول : دن دہاڑے آسنسول ساؤتھ پولیس پوسٹ کے تحت ستائیسہ موڑ پر دو بائیک سواروں نے بندوق کی نوک پر ایک چاول تاجر کے ملازمین سے 11 لاکھ روپے سے زیادہ کی رقم لوٹ لی۔
نِیامت پور مرچنٹ چیمبر آف کامرس کے سیکریٹری سچن بالودیا کے مطابق، تاجر راکیش جُلانیا کے ملازمین بَرن پور سے کاروباری رقم لے کر واپس آ رہے تھے کہ اچانک دو موٹر سائیکل سوار افراد نے انہیں روکا، بندوق دکھا کر بیگ چھین لیا اور فرار ہو گئے۔
متاثرین کا کہنا ہے کہ لٹیروں نے ایک راؤنڈ فائر بھی کیا اور دھمکی دی کہ مزاحمت کی صورت میں انجام برا ہوگا۔ سچن بالودیا نے کہا کہ یہ واقعہ تشویش ناک ہے اور تاجروں میں خوف کا ماحول پیدا کرے گا۔
پولیس کو واقعے کی اطلاع دے دی گئی ہے۔ تاجروں نے مطالبہ کیا ہے کہ جلد از جلد ملزمان کو گرفتار کر کے رقم برآمد کی جائے۔
