آسنسول میونسپل کارپوریشن کے تحت کام کرنے والی آشا کارکنان تنخواہ میں اضافے سمیت مختلف مطالبات کو لے کر 23 دسمبر سے کام بند کر کے احتجاج کر رہی ہیں۔ دوسری جانب گزشتہ سات دنوں سے آسنسول میونسپل کارپوریشن کے صفائی ملازمین بھی تنخواہ میں اضافے اور دیگر مطالبات کے حق میں کارپوریشن کے 106 وارڈوں میں صفائی کا کام بند کر کے احتجاج میں شامل ہیں۔
ان دونوں طبقوں یعنی آشا کارکنان اور صفائی ملازمین کے مطالبات کی حمایت میں جمعرات کی دوپہر 12 بجے کُلٹی بلاک کانگریس کی جانب سے آسنسول میونسپل کارپوریشن کے کلٹی بورو دفتر کے سامنے احتجاجی مظاہرہ کیا گیا۔ اس احتجاج کی قیادت کلٹی بلاک کانگریس کے صدر سکانت داس نے کی، جن کے ساتھ پارٹی کے دیگر کارکنان بھی موجود تھے۔ مظاہرین نے مطالبہ کیا کہ آشا اور صفائی کارکنوں کے مسائل کو فوری طور پر حل کیا جائے اور ان کے جائز مطالبات کو تسلیم کیا جائے۔
