آسنسول 4 فروری: ای ایس آئی کارڈ رکھنے والے مزدوروں کے لیے ایک بڑی راحت کی خبر سامنے آئی ہے۔ بدھ کے روز جموڑیا کے بھوت بنگلہ علاقے میں ریاست کے محنت اور قانون کے وزیر ملئے گھٹک اور مقامی رکنِ اسمبلی ہرے رام سنگھ نے مشترکہ طور پر ایک نئے ای ایس آئی ڈسپنسری کا افتتاح کیا۔ دونوں رہنماؤں نے فیتہ کاٹ کر اس ڈسپنسری کا باضابطہ آغاز کیا۔ اس ڈسپنسری کے شروع ہونے سے اب علاقے کے مزدوروں کو چھوٹے موٹے علاج یا ہنگامی طبی سہولیات کے لیے آسنسول یا درگاپور کے ای ایس آئی اسپتالوں کا رخ نہیں کرنا پڑے گا۔ بھوت بنگلہ میں نو تعمیر شدہ اس ای ایس آئی ڈسپنسری میں انجکشن، ابتدائی طبی امداد، سِک سرٹیفکیٹ سمیت کئی اہم طبی دستاویزات یہیں دستیاب ہوں گی۔ ڈسپنسری کے قیام کا بنیادی مقصد جموڑیا صنعتی علاقے میں کام کرنے والے مزدوروں کو ان کے نزدیک ہی آسان اور سستی صحت خدمات فراہم کرنا ہے، تاکہ علاج یا سرٹیفکیٹ کے لیے انہیں دور دراز اسپتالوں کے چکر نہ لگانے پڑیں۔ افتتاحی تقریب کے موقع پر ای ایس آئی اسپتال کے افسران کے ساتھ ساتھ بلاک صدر سدھارتھ رانا، سبرت ادھیکاری، سکمار بھٹاچاریہ، مقامی پنچایت رکن نتھونی دوسادھ اور بڑی تعداد میں مقامی لوگ موجود تھے۔ پروگرام کے دوران مقامی مزدوروں نے اس اقدام کا خیر مقدم کرتے ہوئے ریاستی حکومت کا شکریہ ادا کیا۔
