مغربی بنگال کے ضلع مغربی بردھمان کے آسنسول کے قریب بارابنی علاقے کے گورانڈی میں بی جے پی کی ’پریورتن یاترا‘ کے دوران شدید جھڑپ کا واقعہ پیش آیا، جس کے بعد علاقے میں کشیدگی پھیل گئی۔
الزام ہے کہ ارجیت رائے کی قیادت میں بی جے پی کارکنوں کے ایک گروپ نے اچانک مقامی ترنمول کانگریس کے کارکنوں پر حملہ کر دیا۔ اس حملے میں ایک سائیکل اسٹینڈ کے ملازم سمیت کئی ترنمول کارکن زخمی ہو گئے اور بعض کے سر پھٹ گئے۔
اطلاعات کے مطابق زخمیوں کو فوری طور پر اسپتال منتقل کیا گیا۔ ترنمول کے بلاک صدر اسیر سنگھا نے زخمی کارکنوں کو علاج کے لیے اسپتال میں داخل کرایا۔
اس واقعے کے بعد بارابنی تھانے میں بی جے پی لیڈر ارجیت رائے کے خلاف تحریری شکایت درج کرائی گئی ہے۔ پولیس نے جمعہ کی دیر رات ملزم کے گھر پر چھاپہ مارا، تاہم وہ وہاں موجود نہیں تھا۔
بعد ازاں پولیس نے سنیچر کی صبح ارجیت رائے کو پوچھ گچھ کے لیے تھانے طلب کیا ہے۔ اس واقعے کے بعد پورے علاقے میں کشیدگی اور سنسنی کا ماحول بنا ہوا ہے، جبکہ پولیس صورت حال پر نظر رکھے ہوئے ہے۔
