مغربی بنگال کے برن پور میں واقع سیل آئی ایس پی (ایسکو) کارخانے میں ایک ٹھیکہ مزدور کی اچانک موت سے سنسنی پھیل گئی۔ منگل کی صبح آسنسول کے سیتارام پور کے رہنے والے 42 سالہ راجندر ساؤ کو کارخانے کے اندر بے ہوشی کی حالت میں پایا گیا۔ ساتھی مزدوروں نے فوری طور پر انہیں بچا کر علاج کے لیے پہلے کارخانے کے اندر واقع او ایچ ایس مرکز لے جایا، جہاں سے ان کی حالت تشویشناک دیکھتے ہوئے انہیں برنپور اسپتال منتقل کیا گیا۔ تاہم برنپور اسپتال کے ڈاکٹروں نے معائنہ کے بعد انہیں مردہ قرار دے دیا۔
واقعہ کی اطلاع ملتے ہی مختلف مزدور یونینوں کے رہنما بھی اسپتال پہنچ گئے۔ یونین رہنماؤں نے مطالبہ کیا کہ متوفی کے اہل خانہ کو مناسب معاوضہ دیا جائے اور خاندان کے ایک فرد کو نوکری فراہم کی جائے۔
بتایا جاتا ہے کہ راجندر ساؤ مکھرجی کنسٹرکشن کمپنی کے ملازم تھے اور سیل آئی ایس پی میں ٹھیکہ پر کام کر رہے تھے۔ یونین کی مداخلت کے بعد انتظامیہ کی جانب سے متوفی کے خاندان کے ایک فرد کو ملازمت کا تقرری نامہ دے دیا گیا۔ اس کے علاوہ برنپور کنسٹرکشن ایسوسی ایشن نے آخری رسومات کے اخراجات کے لیے 37 ہزار روپے بطور معاوضہ فراہم کیے۔
بعد ازاں راجندر ساؤ کی لاش ہیر اپور تھانہ پولیس کے حوالے کر دی گئی۔ پولیس نے لاش کو پوسٹ مارٹم کے لیے آسنسول ضلع اسپتال بھیج دیا ہے۔
معلوم ہوا ہے کہ متوفی کے پسماندگان میں بیوی اور دو بچے شامل ہیں۔ برنپور سیل آئی ایس پی کے اسپات کرمچاری سنگھ (بی ایم ایس) کے رہنما شری کانت شاہ نے بتایا کہ منگل کی صبح راجندر ساؤ کو کارخانے کے اندر بے ہوش حالت میں پایا گیا تھا۔ مزدوروں نے انہیں فوری طور پر علاج کے لیے او ایچ ایس لے جایا، جہاں سے برنپور اسپتال منتقل کیا گیا لیکن ڈاکٹروں نے انہیں مردہ قرار دے دیا۔ انہوں نے یہ بھی بتایا کہ متوفی کے ناک اور منہ سے خون بہہ رہا تھا۔
انہوں نے کہا کہ متوفی کے خاندان کے ایک فرد کو ملازمت دینے کا تقرری نامہ دیا گیا ہے۔ ساتھ ہی انتظامیہ سے مطالبہ کیا گیا ہے کہ مزدور کی موت کی اصل وجہ کی مکمل جانچ کی جائے۔
ادھر پولیس کے مطابق پوسٹ مارٹم رپورٹ آنے کے بعد ہی موت کی اصل وجہ واضح ہو سکے گی۔ فی الحال اس معاملے میں غیر فطری موت کا مقدمہ درج کر کے تفتیش شروع کر دی گئی ہے۔
