انڈال تھانہ کے بن بہال پولیس چوکی علاقے کے تحت سیدولی گاؤں کے باؤری پاڑہ میں تالا بند کمرے سے چوری کی واردات سے علاقے میں سنسنی پھیل گئی۔ پولیس نے معاملے کی تفتیش شروع کر دی ہے۔
ذرائع کے مطابق مقامی رہائشی اُتپل باؤری بھائی پھوٹا کے موقع پر اپنی بہن کے گھر گئے تھے، جبکہ ان کی اہلیہ چندنا باؤری اپنے میکے پراسکول گئی تھیں۔ جمعہ کی صبح دونوں جب واپس گھر لوٹے تو دیکھا کہ بیرونی دروازے پر تالا بند تھا، لیکن اندرونی دروازہ بغیر تالے کے کھلا ہوا تھا۔ گھر کے اندر الماری کھلی پڑی تھی اور سامان ادھرادھر بکھرا ہوا تھا۔ متاثرہ جوڑے کے مطابق، گھر سے کئی سونے کے زیورات اور تقریباً پانچ ہزار روپے نقد غائب ہیں۔ اطلاع ملتے ہی بن بہال چوکی پولیس موقع پر پہنچی اور واقعے کی تفتیش شروع کر دی۔ پولیس افسر نے بتایا کہ ملزمین کی تلاش میں چھاپہ ماری کی جا رہی ہے۔
