مزدوروں کے جائز حقوق کے مطالبے پر ترنمول سے باغی مزدور تنظیموں نے جنوبی بنگال اسٹیٹ ٹرانسپورٹ کارپوریشن کے مرکزی دفتر درگاپور میں شدید احتجاج کیا۔ ایس بی ایس ٹی سی ایمپلائیز ایسوسی ایشن اور ایس بی ایس ٹی سی کنٹریکٹر لیبر یونین کی جانب سے ہیڈ آفس کے اندر میراتھن دھرنا و احتجاجی مہم شروع کی گئی، جس میں بڑی تعداد میں کارکنان اور لیڈران شریک ہوئے۔ اطلاعات کے مطابق، مزدور تنظیم کے دفتر سے پیکٹ ہاتھوں میں لے کر جلوس کی صورت میں مظاہرین انتظامی ہیڈ کوارٹر کے اندر داخل ہوئے۔ انہوں نے اندر پہنچ کر تنظیم کا پرچم لہرایا اور دھرنا منچ پر بیٹھ کر احتجاج کا آغاز کیا۔
مظاہرین نے کہا کہ حکومت کی پالیسیاں ٹھیک ہو سکتی ہیں، لیکن مقامی انتظامیہ اور محکماتی حکام کی من مانی اور لاپرواہی کے خلاف سخت غصہ ہے۔ انہوں نے مطالبات تسلیم ہونے تک احتجاج جاری رکھنے کا اعلان کیا۔
