اپنے دیرینہ مطالبات کے حق میں درگاپور کے عارضی میونسپل صحت ورکروں نے سوموار کے روز کام بند رکھ کر سڑک پر دھرنا اور راستہ جام کیا۔ یہ احتجاج بانکوڑہ کے بَڑجوڑا میں وزیراعلیٰ کی مجوزہ ریلی سے ایک دن قبل درگاپور سٹی سینٹر علاقے میں درگاپور میونسپل کارپوریشن کے مرکزی دفتر کے سامنے ہوا، جس سے علاقے میں کشیدگی کا ماحول پیدا ہو گیا۔ احتجاجی کارکنوں کے اہم مطالبات میں ملازمت کی مستقل حیثیت، ماہانہ کم از کم 15 ہزار روپے تنخواہ، ای ایس آئی اور پی ایف کی سہولتیں شامل ہیں۔
مظاہرین کا کہنا ہے کہ یہ مطالبات طویل عرصے سے زیر التوا ہیں، جس کی وجہ سے وہ مجبوراً کام چھوڑ کر احتجاج پر اترے ہیں۔ اس موقع پر ہاتھوں میں پلے کارڈ لیے تقریباً 175 عارضی میونسپل صحت ورکروں نے دھرنے میں حصہ لیا۔ سڑک جام ہونے کے باعث کچھ وقت کے لیے ٹریفک متاثر رہی اور سٹی سینٹر کا پورا علاقہ نعروں سے گونج اٹھا۔
ورکروں کا الزام ہے کہ وہ برسوں سے اہم عوامی خدمات انجام دے رہے ہیں، اس کے باوجود انہیں بنیادی حقوق سے محروم رکھا جا رہا ہے۔ کئی سالوں کی خدمت کے بعد بھی ان کا مستقبل غیر یقینی بنا ہوا ہے۔ موقع پر پہنچ کر درگاپور میونسپل کارپوریشن کے وائس چیئرمین دھرمندر یادو نے مظاہرین سے کام پر واپس لوٹنے کی اپیل کی، لیکن انہوں نے واضح طور پر کہا کہ جب تک ان کے مطالبات تسلیم نہیں کیے جاتے، وہ کام پر واپس نہیں جائیں گے۔ مظاہرین نے خبردار کیا کہ اگر مطالبات پورے نہ ہوئے تو آنے والے دنوں میں تحریک کو مزید تیز کیا جائے گا اور بڑے پیمانے پر احتجاجی پروگرام شروع کیے جائیں گے۔
وزیراعلیٰ کی ریلی سے قبل اس احتجاج کو انتظامیہ کے لیے ایک نیا چیلنج قرار دیا جا رہا ہے، جبکہ سیاسی اور انتظامی حلقوں میں اس معاملے پر بحث تیز ہو گئی ہے۔
