پاناگڑھ ایئر فورس کیمپ کے سامنے اتوار کی صبح ایک میتھین گیس سے بھرے کیپسول سلنڈر میں گیس لیک ہونے کا واقعہ پیش آیا، جس کے بعد قومی شاہراہ نمبر 19 پر کولکاتا جانے والی لین میں عارضی طور پر ٹریفک بند کر دی گئی۔ واقعے سے علاقے میں کچھ دیر کے لیے سنسنی پھیل گئی، تاہم خوش قسمتی سے کسی جانی یا مالی نقصان کی اطلاع نہیں ہے۔
ذرائع کے مطابق درگاپور کے گوپال پور سے پاناگڑھ صنعتی علاقے کی جانب جا رہا ایک ٹریلر، جس میں میتھین گیس سے بھرے آٹھ کیپسول سلنڈر لادے گئے تھے، کانکسا کے بیروڈیہا علاقے میں ایئر فورس کیمپ کے گیٹ کے قریب پہنچا تو ٹریلر کے ڈرائیور اور خلاصی نے ایک سلنڈر کے پائپ سے گیس کے اخراج کو محسوس کیا۔ صورتحال کی سنگینی کو دیکھتے ہوئے دونوں نے فوری طور پر ٹریلر کو قومی شاہراہ پر روک دیا اور خود محفوظ مقام پر چلے گئے۔
اطلاع ملتے ہی کانکسا تھانے کی پولیس اور پاناگڑھ فائر اسٹیشن کے فائر بریگیڈ کے اہلکار ایک فائر انجن کے ساتھ موقع پر پہنچ گئے۔ احتیاطی تدابیر کے تحت پورے علاقے کو گھیرے میں لے لیا گیا اور قومی شاہراہ پر ٹریفک روک دی گئی۔ ساتھ ہی گیس کمپنی کے افسران کو بھی واقعے کی اطلاع دی گئی۔ تقریباً ایک گھنٹے بعد گیس کمپنی کے افسران موقع پر پہنچے اور مرمت کا کام شروع کیا، جس کے بعد صورتحال قابو میں آ گئی اور ٹریفک کو بحال کر دیا گیا۔ ٹریلر کے خلاصی اُتپل ہاجرا نے بتایا کہ پاناگڑھ ایئر فورس کیمپ کے قریب پہنچتے ہی انہیں گیس لیک ہونے کا اندازہ ہوا، جس کے فوراً بعد انہوں نے ٹریلر روک دیا۔ وہیں پاناگڑھ فائر اسٹیشن کے فائر آفیسر پرکاش پال نے کہا کہ ٹریلر میں آٹھ میتھین گیس سلنڈر موجود تھے۔ اگرچہ کوئی بڑا حادثہ پیش نہیں آیا، لیکن احتیاط کے طور پر ٹریفک بند رکھا گیا اور لوگوں کو محفوظ مقام پر منتقل کیا گیا۔ پولیس کی مداخلت اور مسلسل کوششوں کے بعد حالات مکمل طور پر معمول پر آ گئے۔
