دُرگاپور کے کوک اوون تھانہ پولیس نے موٹر سائیکل چوری اور خالی گھروں میں تالے توڑ کر چوری کرنے والے ایک ملزم کو گرفتار کیا ہے۔ یہ گرفتاری 16 مئی کو کوک اوون تھانہ حلقہ کے تحت ریلوے کالونی میں ایک خالی مکان میں ہونے والی چوری کے بعد عمل میں آئی۔
ریلوے ملازم انل کمار چند دن قبل بہار کے سہسرام میں واقع اپنے آبائی گھر گئے تھے۔ 16 مئی کی صبح واپسی پر انہوں نے دیکھا کہ گھر کا دروازہ ٹوٹا ہوا ہے۔ گھر کے اندر داخل ہو کر معلوم ہوا کہ الماری بھی ٹوٹی ہوئی ہے اور اس میں رکھے ہوئے سونے چاندی کے زیورات اور کچھ نقد رقم غائب ہیں۔
انہوں نے فوراً کوک اوون تھانے میں تحریری شکایت درج کرائی۔ شکایت ملتے ہی پولیس حرکت میں آئی اور علاقے میں نگرانی شروع کر دی۔ اسی رات دُرگاپور بس اسٹینڈ کے قریب پولیس نے ایک مشتبہ نوجوان کو گھومتے ہوئے دیکھا اور اس سے پوچھ گچھ کی۔ اس کی باتوں میں تضاد پا کر پولیس نے اسے گرفتار کر لیا۔
گرفتار نوجوان کی شناخت بادشاہ خان کے طور پر ہوئی ہے۔ تفتیش کے دوران اس نے اعتراف کیا کہ ریلوے کالونی میں چوری اسی نے کی تھی۔ بعد ازاں پولیس اسے خودیرام کالونی میں واقع اس کے کرایے کے گھر لے گئی، جہاں گھر کے سامنے کھڑی ایک بائیک کی ڈِکی سے چوری شدہ زیورات اور نقد رقم برآمد ہوئی۔
تفتیش سے معلوم ہوا ہے کہ بادشاہ خان ہمیشہ اپنے ساتھ ایک لوہے کی راڈ رکھتا تھا اور بند گھروں کے تالے توڑنے میں ماہر تھا۔ پولیس کو یہ بھی پتہ چلا کہ وہ بائیک چوری کی وارداتوں میں بھی ملوث رہا ہے۔ اسے پہلے بھی رانی گنج پولیس نے کئی موٹر سائیکل چوری کے معاملوں میں گرفتار کیا تھا۔ وہ چوری کی بائیکس کو پُرولیا لے جا کر ایک تاجر کو فروخت کرتا تھا۔ مزید یہ کہ اس کے خلاف بہار میں بھی کئی چوری کے مقدمات درج ہیں۔
آسنسول اور رانی گنج کے بعد، وہ دُرگاپور کی کھودی رام کالونی میں کرائے کے مکان میں رہ کر مجرمانہ سرگرمیاں انجام دے رہا تھا۔ پولیس اس کے دیگر ساتھیوں کی تلاش میں جُٹی ہوئی ہے۔
