غلافِ خانہ کعبہ پر ایک نظر *

خانہ کعبہ کے غلاف یکم محرم الحرام کو تبدیل کیا جائے گا، عرب میڈیا کے مطابق تبدیلِ غلافِ کعبہ کے لئے تمام تر تیاریاں مکمل کر لی گئی ہیں.

خانہ کعبہ دنیا کا پہلا گھر ہے جو اللہ تعالیٰ نے بنی نوع انسان کے لئے زمین پر بنایا ہے، خانہ کعبہ مسجد حرام کے بیچ و بیچ میں واقع ہے،

خانہ کعبہ کی اونچائی 15 میٹر ہے تاہم اس کی چوڑائی ہر جانب مختلف پیمائش رکھتی ہے۔ مغربی جانب اس کی چوڑائی 12 میٹر اور گیارہ سینٹی میٹر ہے۔ مشرقی جانب اس کی چوڑائی 12 میٹر اور 84 سینٹی میٹر ہے۔ جنوبی جانب خانہ کعبہ کی چوڑائی 11 میٹر اور 52 سینٹی میٹر اور شمالی جانب 11 میٹر اور 20 سینٹی میٹر ہے۔ خانہ کعبہ کے ایک کونے پر حجر اسود لگا ہوا ہے، اسی کے سامنے سے طواف شروع کیا جاتا ہے۔ دوسرے کونے کا نام رکن عراقی ہے، جہاں سے حطیم شروع ہوتا ہے۔ تیسرے کونے کا نام رکن شامی ہے، جہاں حطیم ختم ہوجاتا ہے۔ اور چوتھے کونے کو رکن یمانی کہا جاتا ہے۔ خانہ کعبہ کے اندر تین ستون ہیں۔ کعبہ کے اندر رکن عراقی کے پاس سیڑھیاں ہیں، جو کعبہ کی چھت تک جاتی ہیں۔ حدیث میں ہے کہ خانہ کعبہ پر پہلی نظر پڑنے پر جو دعا مانگی جاتی ہے وہ اللہ تعالیٰ قبول فرماتا ہے۔

غلاف کعبہ اور عربی میں كسوة الكعبة، خانہ کعبہ کی دیواروں اور دروازہِ کعبہ کو جس کپڑے سے ڈھانپا جاتا ہے، اس کو کہتے ہیں۔ اس کی ابتدا اسلامی روایات کے مطابق حضرت اسماعیل علیہ السلام نے کی تھی۔ خانہ کعبہ ہمارا قبلہ ہے اور انتہائی مقدس مقام ہے۔ پوری دنیا کے مسلمان اس کی طرف رخ کرکے نماز جیسی مقدس عبادت ادا کرتے ہیں، چوبیس گھنٹے طواف کرتے ہیں اور ہر سال اسلامی مہینے ذوالحجہ کی 8 تا 12 تاريخ کو کعبہ کا حج ادا کرتے ہیں، اور حج اسلام کا پانچواں رکن ہے.

امام محمد بن اسحاق رحمۃاللہ علیہ فرماتے ہیں کہ مجھے بہت سے اہل علم سے یہ بات پہنچی ہے کہ سب سے پہلے جس نے کعبہ کو مکمل غلاف چڑھایا وہ تبع اسعد الحمیری تھے، ان کو خواب میں نظر آیا کہ میں کعبہ کو غلاف چڑھا رہا ہوں، لہٰذا انہوں نے چمڑے کا غلاف چڑھایا، پھر انہیں خواب میں دکھائی دیا کہ اور غلاف چڑھائیں تو انہوں نے یمن کے بنے ہوئے سرخ دھاری دار کپڑے کا غلاف چڑھایا، تبع اسعد الحمیری کے بعد دور جاہلیت میں بہت سے لوگوں نے اپنے اپنے وقت میں خانہ کعبہ پر غلاف چڑھائے، کیونکہ اسے دینی فریضہ خیال کیا جاتا تھا، البتہ یہ قید نہ تھی کہ کب چڑھایا جائے اور کیسا چڑھایا جائے، کعبہ کو مختلف قسم کے کپڑوں کے غلاف چڑھائے جاتے رہے، مثلاً چمڑے کا غلاف، معافر یعنی یمن کے علاقے ہمدان کی بستیوں میں تیار شدہ کپڑے کا غلاف، اسی طرح یمن سے بنے ہوئے سرخ دھاری دار کپڑے کا غلاف، ہلکے اور باریک قسم کے کپڑے کا غلاف اور یمن کے کامدار کڑھے ہوئے کپڑے کا غلاف وغیرہ. شروع میں غلاف اوپر تلے کعبہ پر ڈال دئیے جاتے تھے، جب زیادہ بوجھل ہو جاتے یا کوئی غلاف زیادہ پرانا ہو جاتا تو اسے ٹکڑے کر کے تبرکاً تقسیم کر دیا جاتا، یا دفن کر دیا جاتا. دور جاہلیت میں قریش باہمی تعاون سے غلاف تیار کرتے تھے، ہر قبیلے پر اس کی مالی حیثیت کے مطابق رقم مقرر کر دی جاتی تھی ، قصَی کے دور تک یہی طریقہ کار تھا، حتی کہ ابو ربیعہ بن مغیرہ مخزومی کا دور آیا وہ تجارت کی غرض سے یمن آیا جایا کرتا تھا وہ بہت مالدار تھا اس نے اعلان کیا کہ ایک سال میں اکیلا غلاف چڑھایا کروں گا اور ایک سال قریش مل کر، وہ اپنی وفات تک اس پر کار بند رہا، وہ یمن کے شہر جند سے بہترین دھاری دار کپڑے لاتا اور ایک غلاف تیار کرتا، قریش نے اسے “عدل” کا خطاب دیا، کیونکہ اس اکیلے شخص نے تمام قریش کے برابر کام کیا، اس کی اولاد کو بنو عدل کہا جاتا ہے.