بھارتی فضائیہ کی جانب سے “آپریشن سندور” کے تحت پاکستان اور پاکستان کے زیرِ انتظام کشمیر (PoK) میں دہشت گرد ٹھکانوں پر بڑے پیمانے پر میزائل حملے کیے گئے ہیں۔ اس کے بعد ملک کے مختلف ہوائی اڈوں پر سیکیورٹی وجوہات کی بنا پر پروازوں میں شدید خلل دیکھا جا رہا ہے۔
سب سے زیادہ اثر جموں و کشمیر کے سری نگر ایئرپورٹ پر پڑا ہے، جسے اگلے احکامات تک عام عوام کے لیے مکمل طور پر بند کر دیا گیا ہے۔ اس فیصلے سے سینکڑوں مسافر متاثر ہوئے ہیں۔
*ایئر انڈیا کی پروازیں منسوخ*
ایئر انڈیا نے جموں، سری نگر، لیہہ، جودھپور، امرتسر، بھُج، جام نگر، چندی گڑھ اور راج کوٹ جانے اور آنے والی تمام پروازیں آج دوپہر 12 بجے تک منسوخ کر دی ہیں۔ جبکہ امرتسر پہنچنے والی دو بین الاقوامی پروازوں کو دہلی کی طرف موڑ دیا گیا ہے۔
*اسپائس جیٹ کا اہم اعلان*
بھارت کی کارروائی کے بعد اسپائس جیٹ ایئر لائن نے بھی بڑا فیصلہ کیا ہے۔ ایئر لائن کے جاری کردہ بیان میں کہا گیا ہے کہ موجودہ صورتحال کے پیشِ نظر دھرمشالہ، لیہہ، جموں، سری نگر اور امرتسر سمیت شمالی بھارت کے کئی ایئرپورٹس اگلے احکامات تک بند کر دیے گئے ہیں۔ اس وجہ سے پروازیں متاثر ہو سکتی ہیں۔ مسافروں سے گزارش ہے کہ روانگی سے قبل اپنی پرواز کی صورتحال ضرور چیک کریں۔
*انڈیگو ایئر لائن کا بیان*
انڈیگو ایئرلائن نے بھی ایک بیان جاری کیا ہے جس میں کہا گیا ہے کہ فضائی حدود کی بدلتی صورتحال کے باعث سری نگر، جموں، امرتسر، لیہہ، چندی گڑھ، دھرمشالہ اور بیكانیر سے آنے اور جانے والی پروازیں متاثر ہوئی ہیں۔ مسافروں سے گزارش ہے کہ ایئرپورٹ روانہ ہونے سے پہلے ویب سائٹ پر پرواز کی تفصیلات ضرور دیکھ لیں۔
یاد رہے کہ بھارت نے مظفرآباد، کوٹلی اور بہاولپور میں دہشت گردوں کے اڈوں پر بڑے میزائل حملے کیے ہیں جن میں بڑی تعداد میں دہشت گردوں کے ہلاک ہونے کی اطلاعات ہیں، تاہم اب تک سرکاری طور پر کسی ہلاکت کی تصدیق نہیں کی گئی۔
یہ کارروائی 22 اپریل کو پہلگام میں ہونے والے دہشت گرد حملے کے بعد کی گئی ہے، جس میں 26 بے گناہ افراد جاں بحق ہو گئے تھے۔ اس حملے کی ذمہ داری “دی ریزسٹنس فرنٹ” نے قبول کی تھی۔
