*براچک ریلوے اسٹیشن پر آر پی ایف کی بڑی کارروائی، مشتبہ شخص کے بیگ سے 14 کلو چاندی کے زیورات برآمد*
آسنسول کے براچک ریلوے اسٹیشن پر ریلوے پروٹیکشن فورس (آر پی ایف) نے ایک مشتبہ شخص کو گرفتار کر کے اس کے قبضے سے تقریباً 14 کلو چاندی کے زیورات برآمد کیے ہیں۔ واقعہ کے بعد علاقے میں سنسنی پھیل گئی ہے، جبکہ معاملے کی جانچ میں اب انکم ٹیکس محکمہ بھی شامل ہو گیا ہے۔ موصولہ اطلاعات کے مطابق مذکورہ شخص ایک بیگ ہاتھ میں لیے ریلوے اسٹیشن پر ٹرین کا انتظار کر رہا تھا۔ اسی دوران گشت پر موجود آر پی ایف اہلکاروں کو اس کی حرکات و سکنات مشتبہ معلوم ہوئیں، جس کے بعد اسے حراست میں لے کر اس کے بیگ کی تلاشی لی گئی۔ تلاشی کے دوران بیگ سے تقریباً 14 کلو وزنی چاندی کے زیورات برآمد ہوئے۔ جب آر پی ایف نے ملزم سے ان زیورات سے متعلق قانونی کاغذات اور دستاویزات طلب کیے تو وہ کوئی بھی قابلِ اطمینان جواب پیش نہ کر سکا۔ دورانِ پوچھ گچھ بھی وہ ٹیم کو گمراہ کرنے کی کوشش کرتا رہا۔
بعد ازاں آر پی ایف اہلکار اسے کمارپور واقع براچک آر پی ایف پوسٹ لے آئے، جہاں اس سے تفصیلی تفتیش جاری ہے۔ معاملے کی سنگینی کو دیکھتے ہوئے آر پی ایف نے فوری طور پر انکم ٹیکس محکمہ کو اطلاع دی، جس کے بعد محکمہ کی ٹیم موقع پر پہنچی اور ضبط شدہ زیورات کی باریک بینی سے جانچ شروع کر دی۔
فی الحال آر پی ایف اور انکم ٹیکس محکمہ کی ٹیمیں مشترکہ طور پر اس پورے معاملے کی تحقیقات کر رہی ہیں۔ اس بات کا بھی پتہ لگایا جا رہا ہے کہ ملزم اتنی بڑی مقدار میں چاندی کے زیورات کہاں سے لایا تھا اور انہیں کہاں پہنچا کر کس کے حوالے کرنے والا تھا۔ حکام اس زاویے سے بھی جانچ کر رہے ہیں کہ آیا اس معاملے کے پیچھے کوئی بڑا اسمگلنگ نیٹ ورک یا غیر ملکی رابطہ تو موجود نہیں۔
