جھارکھنڈ کے چیرکنڈا سے سیر و تفریح اور مذہبی مقامات کی زیارت کے لیے آسنسول آئے ایک خاندان کے ساتھ اتوار کے روز چوری کی ایک بڑی واردات پیش آئی۔ آسنسول اولڈ اسٹیشن علاقے میں جی ٹی روڈ پر تنشک شوروم کے سامنے کھڑی کار کا شیشہ توڑ کر نامعلوم چور خواتین کا پرس لے کر فرار ہوگئے۔
موصولہ اطلاعات کے مطابق، چیرکنڈا باشندہ جسمیت اپنے سالے وکی ساؤ اور نیہا ساؤ کے ہمراہ آسنسول آئے تھے۔ شہر پہنچنے کے بعد انہوں نے پہلے ایک مقامی مندر میں پوجا کی اور اس کے بعد دوپہر کے وقت جی ٹی روڈ پر واقع ایک ہوٹل میں کھانا کھانے چلے گئے۔ انہوں نے اپنی کار تنشک شوروم کے سامنے سڑک کنارے پارک کی تھی۔ جسمیت نے اس سلسلے میں بتایا کہ جب وہ کھانا کھا کر واپس آئے تو دیکھا کہ گاڑی کے پچھلے دروازے کا شیشہ ٹوٹا ہوا ہے اور اندر رکھا خواتین کا پرس غائب ہے۔ چوری شدہ پرس میں تقریباً پانچ ہزار روپے نقد کے علاوہ چند اہم دستاویزات اور ضروری سامان موجود تھا۔
واقعے کی اطلاع ملتے ہی مقامی پولیس موقع پر پہنچ گئی اور تحقیقات کا آغاز کر دیا۔ پولیس جائے وقوعہ اور اس کے اطراف نصب سی سی ٹی وی کیمروں کی فوٹیج کا جائزہ لے رہی ہے تاکہ ملزمان کی شناخت کرکے انہیں گرفتار کیا جا سکے۔ دن دہاڑے شہر کی مصروف شاہراہ پر پیش آنے والی اس واردات کے بعد مقامی شہریوں اور گاڑی مالکان میں تحفظ کے حوالے سے تشویش پائی جا رہی ہے۔
