*کوئلہ اسمگلنگ اور منی لانڈرنگ کیس میں اے ڈی پی سی کے اسپیشل برانچ افسر منورنجن منڈل گرفتار*
آسنسول-درگاپور پولیس کمشنریٹ کی اسپیشل برانچ میں تعینات پولیس افسر منورنجن منڈل کو مبینہ کوئلہ اسمگلنگ اور منی لانڈرنگ کے ایک معاملے میں گرفتار کر لیا گیا ہے۔ تفتیشی ایجنسیاں کافی عرصے سے ان کے مبینہ طور پر غیر قانونی کوئلہ اور بالو (ریت) سنڈیکیٹ سے تعلقات کی جانچ کر رہی تھیں۔
اس سے قبل انفورسمنٹ ڈائریکٹوریٹ (ای ڈی) نے منورنجن منڈل کی رہائش گاہ سمیت متعدد مقامات پر چھاپہ ماری کی تھی۔ تفتیش کے دوران بڑے پیمانے پر مالی لین دین اور سنڈیکیٹ سے وابستہ نیٹ ورک کے حوالے سے اہم سراغ ملنے کا دعویٰ کیا گیا ہے۔
ذرائع کے مطابق منورنجن منڈل آسنسول-درگاپور پولیس کمشنریٹ کے مختلف تھانوں میں اہم عہدوں پر فائز رہ چکے ہیں اور بعد میں انہیں اسپیشل برانچ میں تعینات کیا گیا تھا۔ تفتیشی ایجنسیاں اس معاملے سے جڑے دیگر افراد کے کردار کی بھی جانچ کر رہی ہیں اور نیٹ ورک کے مختلف پہلوؤں کو کھنگالا جا رہا ہے۔
قابل ذکر ہے کہ منورنجن منڈل کو گزشتہ کئی مہینوں سے بار بار طلب کیا جا رہا تھا، تاہم وہ تفتیش میں حاضر نہیں ہو رہے تھے۔ اس کے علاوہ ایک تھانے میں ترنمول کانگریس (ٹی ایم سی) کے ایک مقامی رہنما کی سالگرہ منانے کے معاملے پر بھی وہ تنازعات میں گھر گئے تھے۔ اس واقعے کے بعد انہیں معطل (سسپنڈ) بھی کر دیا گیا تھا۔
فی الحال معاملے کی تفتیش جاری ہے اور ایجنسیاں اس پورے نیٹ ورک سے متعلق مزید شواہد اکٹھا کرنے میں مصروف ہیں۔
