آسنسول جنوبی اسمبلی حلقہ میں سیاسی ماحول اس وقت خاصا گرم ہو گیا ہے۔ رحمت نگر میں ترنمول کانگریس کے پارٹی دفتر میں منعقدہ ایک پریس کانفرنس کے دوران 82 نمبر وارڈ کی کونسلر نرگس بانو نے بی جے پی کی سابقہ رکن اسمبلی اگنی مترا پال پر جھوٹے اخراجات کی فہرست پیش کرنے کا الزام عائد کیا۔
کونسلر نرگس بانو نے دعویٰ کیا کہ گزشتہ پانچ برسوں میں علاقے کی ترقی کے لیے اگنی مترا پال نے کوئی نمایاں قدم نہیں اٹھایا۔ حالانکہ حال ہی میں انہوں نے یہ دعویٰ کیا تھا کہ 82 نمبر وارڈ میں 49 سولر لائٹس نصب کی گئی ہیں، جسے کونسلر نے مکمل طور پر بے بنیاد قرار دیا۔ انہوں نے مزید کہا کہ علاقے میں جو بھی ترقیاتی کام ہوئے ہیں، وہ بنیادی طور پر ریاست کی وزیر اعلیٰ ممتا بنرجی کی پہل کا نتیجہ ہیں، اور موجودہ کونسلر کے طور پر وہ ان ترقیاتی کاموں کو آگے بڑھا رہی ہیں۔
اس موقع پر موجود سابق کونسلر سہراب علی نے بھی انہی الزامات کی تائید کرتے ہوئے کہا کہ اگنی مترا پال کے دورِ ایم ایل اے میں علاقے میں کوئی نمایاں ترقی نظر نہیں آئی۔ ان کا کہنا تھا کہ بیشتر ترقیاتی کام سابق ایم ایل اے تاپس بنرجی کے دور میں مکمل ہوئے تھے، جنہیں اب مزید آگے بڑھایا جا رہا ہے۔
تاہم ان الزامات کے حوالے سے بی جے پی کی جانب سے اب تک کوئی باضابطہ ردِعمل سامنے نہیں آیا ہے۔
