بوتھ میں حادثاتی طور پر مکئی کی فصل جل کر تباہ
متاثرہ کسانوں کو صدر تلنگانہ رکشنا سینا کے کویتا کا دلاسہ
عادل آباد ضلع کے بوتھ منڈل کے کنوگٹہ علاقہ میں حادثاتی طور پر 100 ایکڑ سے زائد پر محیط مکئی کی فصل جل کر تباہ ہونے پر تلنگانہ رکشنا سینا (ٹی آر ایس) کی سربراہ کلواکنٹلہ کویتا نے گہری تشویش کا اظہار کیا۔
کویتا نے متاثرہ کسانوں سے فون پر بات کی اور انہیں دلاسہ دیا۔ اس موقع پر بوتھ کے سابق رکن اسمبلی راتھوڑ باپوراؤ اور ٹی آر ایس رہنما بی مونیکا بھی موجود تھیں، جنہوں نے متاثرہ کسانوں سے گفتگو کی۔انہوں نے کسانوں کو حوصلہ دیتے ہوئے کہا کہ وہ اس نقصان کے معاملے کو حکومت کی توجہ میں لاکر انصاف دلانے کے لئے دباؤ ڈالیں گے۔کویتا نے حکومت سے مطالبہ کیا کہ وہ فوری طور پر ردعمل ظاہر کرتے ہوئے مکئی کی فصل جلنے سے متاثرہ کسانوں کو ہنگامی امداد فراہم کرے۔ نقصان کا تخمینہ لگا کر مناسب معاوضہ دیا جائے اور کسانوں کی بھرپور مدد کی جائے۔
