*ضلع مجسٹریٹ ایشان پرتاپ سنگھ کی صدارت میں سمپورن سَمادھان دیوس کا انعقاد*
*ضلع کی تمام تحصیلوں میں 441 درخواستیں موصول، 41 شکایات کا موقع پر فوری ازالہ*
بارہ بنکی،(ابو شحمہ انصاری)عام لوگوں کے مسائل کے فوری، شفاف اور مؤثر ازالے کے مقصد سے تحصیل نواب گنج میں سمپورن سَمادھان دیوس کا انعقاد ضلع مجسٹریٹ ایشان پرتاپ سنگھ کی صدارت میں کیا گیا۔ اس موقع پر پولیس سپرنٹنڈنٹ ارپت اور مشترکہ مجسٹریٹ و نائب ضلع مجسٹریٹ نواب گنج گنجیتا اگروال موجود رہیں۔ ضلع مجسٹریٹ نے فریادیوں کے مسائل نہ صرف سنجیدگی سے سنے بلکہ ہر شکایت سے متعلق افسر کو طلب کرکے معیاری ازالے کی ہدایات دیں۔
سمپورن سَمادھان دیوس کے دوران ضلع مجسٹریٹ نے خصوصی طور پر ہدایت دی کہ چک مارگ اور سرکاری راستوں پر تجاوزات سے متعلق شکایات کو سنجیدگی سے لیا جائے۔ انہوں نے کہا کہ ایسی شکایات میں متعلقہ محکمۂ مال کے اہلکاروں کی ذمہ داری طے کی جائے گی اور لاپروائی پائے جانے پر سخت کارروائی یقینی بنائی جائے گی۔
ضلع مجسٹریٹ نے تمام متعلقہ افسران کو ہدایت دی کہ اراضی تنازعات، سرکاری راستوں و چک مارگ، راشن کارڈ، پنشن، رہائش اور عام لوگوں سے متعلق دیگر معاملات کا ترجیحی بنیاد پر ازالہ یقینی بنایا جائے۔ انہوں نے واضح کیا کہ سرکاری اراضی کو تجاوزات سے پاک رکھنا انتظامیہ کی اہم ذمہ داری ہے اور اس میں کسی بھی قسم کی لاپروائی برداشت نہیں کی جائے گی۔
ضلع کی تمام تحصیلوں میں منعقد سمپورن سَمادھان دیوس کے دوران مختلف نوعیت کی مجموعی طور پر 441 درخواستیں موصول ہوئیں، جن میں سے 41 شکایات کا موقع پر فوری ازالہ کرایا گیا۔
تحصیل نواب گنج میں 157 درخواستیں موصول ہوئیں، جن میں سے 15 درخواستوں کا موقع پر ازالہ کیا گیا۔ باقی درخواستوں کے بروقت اور معیاری ازالے کے لیے متعلقہ افسران کو ہدایات دی گئیں۔
اسی طرح تحصیل رام سنہی گھاٹ میں نائب ضلع مجسٹریٹ کی صدارت میں سمپورن سَمادھان دیوس منعقد ہوا، جس میں محکمۂ مال اور تحصیل سطح کے افسران موجود رہے۔ یہاں 72 درخواستیں موصول ہوئیں، جن میں سے 9 شکایات کا فوری ازالہ کرایا گیا۔
سرولی غوث پور میں چیف ڈیولپمنٹ آفیسر کی صدارت میں پروگرام منعقد ہوا، جہاں 26 درخواستیں موصول ہوئیں اور 5 معاملات کا موقع پر ازالہ کیا گیا۔
رام نگر میں ایڈیشنل ضلع مجسٹریٹ کی صدارت میں منعقد پروگرام کے دوران مختلف معاملات سے متعلق 101 درخواستیں موصول ہوئیں، جن میں سے 5 شکایات کا فوری ازالہ کیا گیا۔
فتح پور میں نائب ضلع مجسٹریٹ (عدالتی) کی صدارت میں سمپورن سَمادھان دیوس کا انعقاد ہوا، جس میں 37 درخواستیں موصول ہوئیں اور 4 شکایات کا موقع پر فوری ازالہ کیا گیا۔
اسی طرح حیدر گڑھ میں نائب ضلع مجسٹریٹ کی صدارت میں منعقد پروگرام میں 51 درخواستیں موصول ہوئیں، جن میں سے 3 شکایات کا موقع پر فوری ازالہ کرایا گیا۔
