آسنسول کے ساؤتھ پولیس پھانڑی علاقہ کے تحت براچک بوئیلا دھوڑا علاقے میں واقع ایک تالاب کے قریب 15 سالہ لڑکے شوبھم پرساد کی لاش ملنے سے پورے علاقے میں سنسنی پھیل گئی۔ متوفی شوبھم مقامی باشندہ تھا۔
اطلاعات کے مطابق شوبھم کی لاش تالاب کے کنارے زمین پر پڑی ہوئی ملی، جہاں اس کے کپڑے جزوی طور پر کھلے ہوئے تھے۔ خدشہ ظاہر کیا جا رہا ہے کہ وہ رفع حاجت کے لیے تالاب کے پاس گیا ہوگا۔ تاہم اس کی موت کن حالات میں ہوئی، اس کی اصل وجہ تاحال واضح نہیں ہو سکی ہے۔
مقامی لوگوں نے اس واقعے کی اطلاع ساؤتھ پولیس پھانڑی کو دی۔ خبر ملتے ہی پولیس موقع پر پہنچی اور جائے وقوعہ کا باریک بینی سے معائنہ کیا۔ پولیس نے مقامی افراد اور متوفی کے اہل خانہ سے بات چیت کر کے ان کے بیانات بھی قلمبند کیے۔
اہل خانہ کے مطابق شوبھم اتوار کی صبح تقریباً پانچ بجے رفع حاجت کے لیے گھر سے نکلا تھا، لیکن اس کے بعد واپس نہیں آیا۔ صبح قریب چھ بجے مقامی لوگوں نے اہل خانہ کو اطلاع دی کہ شوبھم تالاب کے کنارے زمین پر پڑا ہوا ہے۔ خبر ملتے ہی اس کی والدہ موقع پر پہنچیں اور لوگوں سے مدد کی اپیل کی۔
پولیس نے شوبھم کو ایمبولینس کے ذریعے آسنسول ضلع اسپتال پہنچایا، جہاں ڈاکٹروں نے اسے مردہ قرار دے دیا۔
پولیس کے مطابق پوسٹ مارٹم رپورٹ آنے کے بعد ہی شوبھم کی موت کی اصل وجہ کا انکشاف ہو سکے گا۔ فی الحال پولیس نے معاملے کی تفتیش شروع کر دی ہے۔
