برنپور : سیل اِیسکو اسٹیل پلانٹ کے افسر اور بین الاقوامی کھلاڑی کنتل داس نے جاپان کے شہر ہیماجی میں منعقدہ ایشیا پیسفک افریقہ پاور لفٹنگ (بینچ پریس) مقابلے میں شاندار کارکردگی کا مظاہرہ کرتے ہوئے سونے کا تمغہ اپنے نام کیا۔ اس کامیابی کے ساتھ انہوں نے نہ صرف ریاست بلکہ پورے ملک کا نام روشن کر دیا ہے۔
کنتل داس سیل اِیسکو اسٹیل پلانٹ کے کوک اوون ڈپارٹمنٹ میں اے جی ایم (AGM) کے عہدے پر فائز ہیں۔ 6 سے 14 جولائی تک جاپان کے ہیماجی میں منعقد اس بین الاقوامی مقابلے میں انہوں نے ایم 1، 120 کلوگرام سے زائد وزن کے زمرے میں گولڈ میڈل حاصل کیا۔
اس بین الاقوامی مقابلے میں ایشیا، افریقہ اور ایشیا پیسفک خطے کے کل 22 ممالک کے کھلاڑیوں نے حصہ لیا تھا۔ کنتل داس نے اپنی کامیابی پر خوشی ظاہر کرتے ہوئے بتایا کہ وہ پچھلے دو ماہ سے اس مقابلے کے لیے سخت محنت کر رہے تھے۔
اس سے قبل، وہ 17 سے 24 مئی تک ناروے میں منعقدہ ورلڈ پاور لفٹنگ (بینچ پریس) مقابلے میں بھارت کی نمائندگی کر چکے ہیں، جہاں انہوں نے آٹھواں مقام حاصل کیا تھا۔
اسی کے ساتھ، گزشتہ سال 14 سے 18 اکتوبر کے دوران گوا میں ہونے والی نیشنل پاور لفٹنگ (بینچ پریس) چیمپئن شپ کے ماسٹر کلاسک زمرے میں وہ سلور میڈل بھی جیت چکے ہیں۔
کنتل داس نے افسوس ظاہر کرتے ہوئے کہا کہ وہ ان تمام مقابلوں میں ذاتی خرچ پر شرکت کرتے ہیں اور کمپنی کی طرف سے کسی قسم کی مالی مدد فراہم نہیں کی جاتی۔ اس وجہ سے آئندہ بین الاقوامی مقابلوں میں حصہ لینا ان کے لیے دشوار ہو سکتا ہے۔
واضح ہو کہ کنتل داس 13 جولائی کو برن پور واپس لوٹیں گے۔ ان کی اس شاندار کامیابی پر علاقے میں خوشی کی لہر ہے اور لوگ ان پر فخر محسوس کر رہے ہیں۔
