کلکتہ، 21 جولائی:
ترنمول کانگریس کے قومی جنرل سکریٹری اور پارٹی کے سرکردہ لیڈر ابھیشیک بنرجی نے پیر کے روز دھرم تلا کے تاریخی “شہید منچ” سے بھارتیہ جنتا پارٹی (بی جے پی) پر زوردار لفظی حملہ کرتے ہوئے کہا کہ بی جے پی کے پاس ترنمول جیسا ایک بھی جانثار کارکن نہیں ہے اور وہ آئندہ 100 برسوں میں بھی بنگال کی اقتدار میں واپس نہیں آ سکے گی۔
ابھیشیک بنرجی نے اعلان کیا، “ہم بنگالی زبان میں بات کرتے ہیں، کرتے رہیں گے اور فخر سے کرتے رہیں گے۔ اگر سو بار کہنا پڑا تو سو بار کہیں گے۔ 2026 کے بعد بی جے پی کو بھی ‘جے بنگلہ’ کہنا پڑے گا، یہ لکھ کر رکھ لیجئے۔”
مرکزی حکومت کی پالیسیوں پر تنقید کرتے ہوئے انہوں نے کہا کہ بی جے پی بنگال کے عوام کو ڈٹینشن کیمپ میں بھیجنے کی سازش کر رہی ہے، مگر 2026 کے بعد ہم خود بی جے پی کو وہاں بھیج دیں گے۔ انہوں نے دعویٰ کیا کہ بنگال میں بی جے پی کے لیے کوئی جگہ باقی نہیں رہے گی۔
ای ڈی اور الیکشن کمیشن کے غلط استعمال پر ناراضگی ظاہر کرتے ہوئے انہوں نے کہا، “ہم اپنی ریڑھ کی ہڈی نہیں بیچیں گے۔ اگر ہمارا گلا کاٹ دیا جائے تب بھی ہماری رگوں سے صرف ‘جے بنگلہ’ ہی نکلے گا۔” انہوں نے کہا کہ بی جے پی ای ڈی اور الیکشن کمیشن—دونوں کو بطور ہتھیار استعمال کر کے ووٹر لسٹ سے نام ہٹوا رہی ہے، لیکن ترنمول کانگریس ڈرنے والی نہیں ہے۔
بی جے پی پر اپنے پرانے الزامات دہراتے ہوئے ابھیشیک نے کہا، “ہم نے ہی سب سے پہلے بی جے پی کو بنگال دشمن جماعت قرار دیا تھا۔ جب یہ میدان میں ہار جاتے ہیں تو غریبوں پر حملہ کرنے کی سازش کرتے ہیں۔ یہ ریاست کی ثقافت کی توہین کرتے ہیں اور عوامی فلاحی اسکیموں کے فنڈ روک دیتے ہیں۔ بی جے پی کی اصل شناخت یہی ہے—بنگال دشمن سوچ۔”
جلسے میں پہنچتے ہی ابھیشیک بنرجی نے شہداء کو خراج عقیدت پیش کیا اور موجودہ کارکنان کا پرجوش استقبال کیا۔ ان کے خطاب کے دوران پنڈال میں موجود کارکنان نے زبردست نعرے بازی کی اور پورا ماحول جوش و خروش سے گونج اٹھا۔
